Kompanitë e mëdha të teknologjisë dhe motorët e kërkimit po përpiqen të pajtohen me rregulloret e reja të BE-së që synojnë të rrisin sigurinë e përdoruesve. I miratuar më 16 nëntor 2022, Akti i Shërbimeve Digjitale të BE-së (DSA) përcakton rregulla të rrepta për platformat online, me gjoba të mundshme deri në 6% të xhiros së tyre vjetore, në rast të shkeljes së këtij akti.
Akti është veçanërisht rigoroz për 19 “platforma shumë të mëdha në internet”, duke përfshirë Facebook, TikTok, Amazon dhe Google, të cilave u është dhënë një afat prej katër muajsh për të bërë ndryshimet e nevojshme.
DSA parashtron kërkesa të hollësishme për këto platforma. Ata tani duhet të vlerësojnë dhe raportojnë rreziqet e mundshme, të tilla si përmbajtja e paligjshme, kërcënimet ndaj sigurisë publike dhe shkeljet e të drejtave të fëmijëve. Ky vlerësim gjithashtu duhet të trajtojë çështjet që lidhen me diskriminimin, mbrojtjen e konsumatorëve dhe proceset zgjedhore.
Kompanitë janë të detyruara të diskutojnë detajet e algoritmeve të tyre me rregullatorët, veçanërisht ato algoritme që përcaktojnë mënyrat sesi shfaqen reklamat në këto platforma. Reklamimi i synuar i bazuar në profilizimin e fëmijëve nuk lejohet më.
Një mori ndryshimesh janë tashmë në fuqi. Që nga korriku, TikTok ka ndaluar shfaqjen e reklamave të personalizuara për përdoruesit europianë të moshës 13-17 vjeç. Facebook dhe Instagram kanë ndjekur të njëjtën linjë, duke u dhënë përdoruesve mundësinë për të parë Story dhe Reels-a vetëm nga njerëzit që ndjekin, të renditur sipas rendit kronologjik.
Ndërkohë, Snapchat po kufizon reklamat e personalizuara për përdoruesit e moshës 13-17 vjeç në Mbretërinë e Bashkuar dhe Europë, dhe gjithashtu është angazhuar të krijojë një bibliotekë reklamash të shfaqura në BE. Google ka premtuar akses më të madh në të dhënat e saj për studiuesit.
Wikipedia, e cila mbështet DSA-në si të preferueshme ndaj projektligjit të ardhshëm të sigurisë në internet të Mbretërisë së Bashkuar, nuk parashikon ndryshime që do të ndikojnë në përvojën e përdoruesit.
Ndërsa DSA hyn në fuqi në të gjithë BE-në, këto ndryshime gjithëpërfshirëse janë vendosur të ndryshojnë mjedisin në internet, me kompanitë dhe përdoruesit që përshtaten me një normalitet të ri digjital.
