Një paraqitje e fundit e aktorit kanadez Jim Carrey në ceremoninë e çmimeve César Awards në Paris ka ndezur një valë të re konspiracionesh online. Ajo që duhej të ishte një mbrëmje normale nderimi – me një fjalim në frëngjisht dhe duartrokitje nga publiku – u kthye në objekt dyshimi. Brenda pak orësh, rrjetet sociale u mbushën me pretendime se “ky nuk është Jim Carrey”, por një sozi, një klon apo një person i maskuar.
Përdoruesit nisën të analizonin me imtësi fytyrën e tij: nofullën, buzëqeshjen, rrudhat, mënyrën si lëvizte. U publikuan krahasime me skena nga filmat e tij të viteve ’90, kur ai ishte simbol i energjisë shpërthyese, mimikës elastike dhe lëvizjeve trupore thuajse akrobatike. Sot, në moshën mbi 60 vjeç, Carrey duket më i qetë, më i përmbajtur dhe më i kuruar në paraqitje. Por për disa, ndryshimi nuk është thjesht plakje natyrale – është “provë” se diçka nuk shkon.
Konspiracioni mori hov edhe për shkak të një videoje të vjetër në emisionin Late Night with David Letterman, ku Carrey bënte shaka se përdorte sozi për t’i shpëtuar paparacëve. Një batutë e hedhur vite më parë u rikthye si “dëshmi”. Situata u bë edhe më e paqartë kur artistja e transformimeve Alexis Stone publikoi një imazh me proteza, paruke dhe dhëmbë artificialë, duke lënë të kuptohej – pa e thënë qartë – se mund të kishte imituar Carrey-n në Paris. Mungesa e një sqarimi të drejtpërdrejtë e mbajti zjarrin ndezur.
Në fakt, kush e ka ndjekur karrierën e tij e di se Carrey ka kaluar faza shumë të ndryshme publike. Nga komeditë ikonike me mimikë ekstreme dhe gjuhë trupi thuajse karikaturale, tek intervistat e viteve të fundit ku ai shfaqej më filozofik, shpesh enigmatik dhe kritik ndaj sistemit të famës. Ndryshimi në mënyrën si flet – më i ngadaltë, më reflektues, ndonjëherë i tërhequr – për disa është provë se “nuk është i njëjti person”, ndërsa për të tjerë është thjesht evoluim personal.
Lexo edhe: Ylli i TikTok shet fytyrën, zërin dhe markën e tij për 975 milionë dollarë
Konspiracioni merr hov pikërisht tek kjo kontrast i fortë mes “Jim Carrey-t të dikurshëm”, plot lëvizje spontane e grimasa të ekzagjeruara, dhe figurës aktuale më të përmbajtur. Disa aludojnë për operacione estetike, të tjerë për teknologji manipulimi vizual, madje ka edhe nga ata që flasin për teori më të errëta. Megjithatë, nuk ka asnjë provë konkrete që mbështet këto pretendime – vetëm krahasime videosh dhe interpretime subjektive.
Në fund, mbetet pyetja: a po shohim një mister të vërtetë, apo thjesht mënyrën se si rrjetet sociale e shndërrojnë çdo ndryshim natyral në teori konspirative? Ndoshta ajo që duket “e çuditshme” është thjesht transformimi i një artisti që ka kaluar dekada në skenë, ka ndryshuar si njeri dhe si figurë publike. Por në epokën digjitale, mjafton një detaj ndryshe që dyshimi të marrë jetë më vete..
