Shumë njerëz reagojnë automatikisht në komunikimet e përditshme në punë. Një email dërgohet me nxitim, një përgjigje jepet në takim pa u menduar gjatë dhe vetëm më pas vjen reflektimi: “Ndoshta nuk duhej ta kisha thënë kështu.”
Sipas coach-es së lidershipit Aiko Bethea, pikërisht këto reagime impulsive janë arsyeja pse shumë profesionistë bëjnë gabime në komunikim, marrin vendime të nxituara apo përfundojnë duke thënë “po” për gjëra që në fakt nuk duan t’i bëjnë.
Bethea, themeluese e kompanisë RARE Coaching & Consulting dhe autore e librit “Anchored, Aligned, Accountable”, thotë se ekzistojnë tre pyetje të thjeshta që mund të ndryshojnë mënyrën si komunikojmë në punë:
- Çfarë vlerësoj?
- Çfarë impakti dua të kem?
- Cili është roli im në këtë situatë?
Sipas saj, njerëzit që ndalen për disa sekonda për t’i bërë vetes këto pyetje arrijnë të reagojnë më me qetësi, të komunikojnë më qartë dhe të marrin vendime më të menduara.
1. “Çfarë vlerësoj?”
Pyetja e parë lidhet me identitetin dhe vlerat personale. Bethea sugjeron që para se të flasim apo të dërgojmë një email, duhet të kujtojmë çfarë është realisht e rëndësishme për ne.
Për shembull, nëse një nga vlerat kryesore është puna me kuptim, por vazhdimisht po pranoni projekte që nuk ju motivojnë, kjo pyetje mund t’ju ndihmojë të mos reagoni automatikisht me një tjetër “po”.
Qëllimi nuk është të refuzoni gjithçka, por të bëheni më të vetëdijshëm dhe më intentional në mënyrën si merrni vendime.
2. “Çfarë impakti dua të kem?”
Fjalët kanë peshë, sidomos në komunikimin profesional. Sipas një studimi të përmendur në artikull, 88% e njerëzve janë penduar menjëherë pasi kanë dërguar një email.
Prandaj, Bethea sugjeron që para se të reagojmë, të mendojmë për efektin që duam të krijojmë te personi tjetër.
Ndoshta mesazhi juaj është korrekt, por toni tingëllon agresiv. Ndoshta doni të jeni të qartë, por po perceptoheni si të zemëruar. Vetëm disa sekonda reflektim mund të ndryshojnë mënyrën si formuloni një përgjigje.
Sipas saj, pyetja kryesore duhet të jetë: “Si dua të dal nga kjo situatë dhe si dua të ndihet pala tjetër?”
3. “Cili është roli im në këtë situatë?”
Pyetja e tretë lidhet me përgjegjësinë personale.
Në shumë situata profesionale, njerëzit fokusohen te gabimet e të tjerëve dhe harrojnë të analizojnë rolin e tyre në konflikt, keqkuptim apo problem.
Sipas Bethea, kjo pyetje ndihmon në zhvillimin e vetëdijes dhe përulësisë profesionale. Ndonjëherë roli juaj mund të jetë të dëgjoni më shumë. Herë të tjera, të pranoni një gabim ose të krijoni një ambient ku të tjerët ndihen të sigurt për të folur hapur.
Komunikimi i mirë nuk fillon te fjalët që themi, por te vetëdija që kemi përpara se t’i themi ato.
