Kompania kineze e robotikës Agibot ka realizuar atë që mediat shtetërore në Kinë e cilësuan si transmetimin e parë “live” në botë të robotëve humanoidë që punojnë në një linjë të plotë prodhimi.
Demonstrimi gjashtëditor u zhvillua në fabrikën e Longcheer Technology në qytetin Nanchang, ku tetë robotë humanoidë operuan në një linjë aktive prodhimi tabletash. Gjatë kësaj kohe, ata prodhuan 17.625 tableta, duke arritur një normë suksesi prej 99.99% në kryerjen e detyrave.
Lexo edhe: BE-ja vendos tarifa për blerje nga Temu, AliExpress e kompani të tjera kineze
Robotët punuan për më shumë se 64 orë pa ndërprerje në një ambient real industrial, ndërsa e gjithë performanca u transmetua drejtpërdrejt, për t’i lejuar publikut të ndiqte nga afër funksionimin e tyre.
Modelet Agibot G2 kryen një sërë procesesh të rëndësishme të prodhimit, duke përfshirë kontrollin e cilësisë së tabletave, identifikimin dhe ndarjen e produkteve me defekte, transportin e materialeve dhe mbështetjen në procese të ndryshme të linjës së prodhimit. Në total, robotët realizuan 64.828 detyra, duke bashkëpunuar me punonjësit dhe makineritë industriale.
Sipas presidentit të njësisë së Inteligjencës Artificiale të trupëzuar në Agibot, Yao Maoqing, qëllimi i këtij eksperimenti ishte të tregonte se si robotët humanoidë mund të integrohen në mënyrë efektive në fabrikat moderne dhe të funksionojnë në kushte reale, jo vetëm në laboratorë.
Pas përfundimit të demonstrimit, Agibot njoftoi edhe një tjetër arritje: kompania ka prodhuar robotin e saj të 15.000-të, i cili iu dorëzua partnerit të saj industrial, Longcheer Technology.
Ky sukses vjen vetëm pak muaj pasi kompania amerikane Figure AI realizoi një transmetim 200-orësh me robotët e saj humanoidë, të cilët përpunuan afro 250 mijë pako pa asnjë defekt në pajisje, duke treguar se gara globale për automatizimin industrial me robotë humanoidë po hyn në një fazë të re.
