Nëse raportimet e industrisë rezultojnë të sakta, Grand Theft Auto VI (GTA 6) mund të hyjë në histori si projekti më i shtrenjtë i realizuar ndonjëherë në industrinë e argëtimit. Vlerësimet flasin për një kosto zhvillimi që arrin deri në 2 miliardë dollarë, një shifër që tejkalon jo vetëm çdo videolojë të mëparshme, por edhe shumë filma me buxhet rekord.
Rritja e kostove të serisë Grand Theft Auto tregon edhe transformimin e industrisë së videolojërave gjatë dy dekadave të fundit. GTA: Vice City, i publikuar në vitin 2002, u zhvillua me rreth 3 milionë dollarë. Dy vite më vonë, GTA: San Andreas kushtoi afërsisht 10 milionë dollarë, ndërsa në vitin 2008 GTA IV ngriti standardet me një buxhet prej rreth 100 milionë dollarësh, duke u bërë një nga lojërat më të shtrenjta të kohës.
Në vitin 2013, GTA V e çoi industrinë në një nivel tjetër me një kosto të raportuar prej 265 milionë dollarësh, duke përfshirë zhvillimin dhe marketingun. Loja u shndërrua në një fenomen global, duke gjeneruar miliarda dollarë të ardhura dhe duke vendosur standarde të reja për lojërat me botë të hapur.
Tashmë vëmendja është te GTA 6. Edhe pse kompania Rockstar Games nuk e ka konfirmuar zyrtarisht shifrën prej 2 miliardë dollarësh, raportime të shumta dhe vlerësime nga industria sugjerojnë se investimi mund të ketë arritur këtë nivel. Loja është zhvilluar për vite me radhë nga mijëra zhvillues në studio të ndryshme dhe pritet të sjellë hartën më të madhe të krijuar ndonjëherë nga Rockstar, sisteme shumë më të avancuara të inteligjencës artificiale për personazhet (NPC), si dhe një eksperiencë online shumë më ambicioze.
Lexo edhe: Rikthehet loja legjendare “Crazy Taxi” – publikohet traileri (VIDEO)
Ajo që e bën GTA 6 të veçantë nuk është vetëm buxheti, por ritmi i rritjes së investimit. Nëse GTA V konsiderohej një hap gjigant krahasuar me GTA IV, atëherë kostoja e raportuar e GTA 6 është gati tetë herë më e madhe se ajo e paraardhësit të saj. Kjo tregon se Rockstar nuk synon thjesht të publikojë një vazhdim të serisë, por të krijojë një lojë që mund të ripërcaktojë standardet e industrisë për vitet e ardhshme.
Nëse pritshmëritë përmbushen dhe investimi reflektohet në cilësinë e produktit final, GTA 6 mund të vendosë një pikë reference të re për të gjitha lojërat open-world të dekadës së ardhshme.
