Instagram po ndryshon strategjinë e tij dhe duket se fokusi nuk është më vetëm ekrani i telefonit. Platforma po shtyn gjithnjë e më shumë krijimin dhe shikimin e videove në format horizontal, duke synuar që përmbajtja e krijuesve të mos konsumohet vetëm duke bërë “scroll”, por edhe nga divani i shtëpisë përmes televizorit.
Kompania ka zgjeruar aplikacionin Instagram për TV edhe në televizorët Samsung, pasi më parë ishte i disponueshëm në pajisje si Amazon Fire TV dhe Google TV. Kjo lëvizje e bën më të lehtë që përdoruesit të ndjekin videot e preferuara në ekran të madh, njësoj siç bëjnë sot me YouTube.
Sipas Tessa Lyons, e cituar nga The Hollywood Reporter, televizioni është “frontiera e ardhshme” për Instagram. Arsyeja është se gjithnjë e më shumë krijues po eksperimentojnë me mikro-dramat, serialet me episode të shkurtra dhe përmbajtje të ndërtuar për t’u parë për periudha më të gjata, jo vetëm për disa sekonda.
Lexo edhe 7 mënyra për të rritur trafikun në Instagram në 2026: Më shumë views, reach dhe followers
Ky ndryshim tregon se rrjetet sociale po hyjnë në një fazë të re. Në vend që të konkurrojnë vetëm për vëmendjen e përdoruesve në telefon, ato po përpiqen të fitojnë kohën që njerëzit kalojnë para televizorit. Në këtë aspekt, objektivi kryesor i Instagram është të sfidojë dominimin që YouTube ka ndërtuar prej vitesh në ekranet e mëdha.
Në të njëjtën kohë, po ndodh edhe fenomeni i kundërt. Ndërsa platformat sociale po afrohen me televizionin, shërbimet tradicionale të transmetimit si platformat streaming po marrin elementë tipikë të rrjeteve sociale, si videot vertikale, përmbajtja e shkurtër dhe algoritmet e rekomandimeve.
Nëse kjo strategji rezulton e suksesshme, mënyra se si konsumojmë përmbajtje mund të ndryshojë sërish. Instagram nuk dëshiron të jetë vetëm aplikacioni ku shohim Reels në telefon, por edhe një platformë ku krijuesit publikojnë seriale, dokumentarë të shkurtër dhe video që mund të ndiqen rehat në televizor, duke konkurruar drejtpërdrejt me YouTube dhe platformat e tjera të videove.
