TCL ka prezantuar në IFA 2026 serinë e re të smartphone-ve P80, të përbërë nga TCL P80 Ultra, P80 Pro dhe P80. Risia më interesante gjendet te dy modelet e para, të cilat sipas kompanisë janë telefonat e parë që kombinojnë një ekran AMOLED me teknologjinë NXTPAPER, të krijuar për të reduktuar reflektimet dhe lodhjen e syve gjatë përdorimit të zgjatur.
P80 Ultra dhe P80 Pro kanë ekran NXTPAPER AMOLED 6.83 inç me rezolucion 1.5K, refresh rate 120 Hz dhe ndriçim maksimal deri në 3,200 nit. TCL thotë se teknologjia redukton dritën blu në më pak se 3% dhe përshtat automatikisht ndriçimin dhe temperaturën e ngjyrave sipas ambientit.
Nga smartphone në e-reader me një buton
Veçoria që e dallon serinë është NXTPAPER Key, një buton fizik që mundëson kalimin e menjëhershëm në mënyra të dedikuara për lexim. “Paper Mode” e bën ekranin vizualisht më të ngjashëm me letrën, ndërsa “Max Ink Mode” e shndërron ndërfaqen në monokrom, redukton njoftimet dhe shpërqendrimet, si dhe synon të kursejë baterinë. Në këtë mënyrë, TCL kërkon që telefoni të funksionojë edhe si një lloj e-reader-i, pa pasur nevojë për një pajisje të dytë.
Modeli më i avancuar, TCL P80 Ultra, vjen me procesor MediaTek Dimensity 7400 Elite, 8 GB RAM, deri në 512 GB memorie dhe bateri 5,800 mAh me karikim të shpejtë 45 W. Në pjesën fotografike ka kamerë kryesore 50 MP, telefoto periskopike 50 MP me zoom optik 3x, ultra-wide 8 MP dhe kamerë selfie 32 MP.
P80 Pro dhe P80 ulin çmimin
P80 Pro ruan ekranin NXTPAPER AMOLED, procesorin Dimensity 7400 Elite, baterinë 5,800 mAh dhe butonin NXTPAPER Key, por heq kamerën telefoto. Ai do të kushtojë 429 euro për 256 GB dhe 499 euro për 512 GB në tregun europian.
Modeli bazë TCL P80 nis nga 349 euro dhe ruan ekranin AMOLED 6.83 inç, 1.5K dhe 120 Hz, por nuk ka teknologjinë NXTPAPER dhe as butonin e dedikuar. Ai përdor Dimensity 7300 dhe një bateri më të vogël prej 5,000 mAh.
Të tre modelet ofrojnë IP68, altoparlantë stereo DTS, standard rezistence MIL-STD-810H dhe funksione AI si Google Gemini, Circle to Search, përkthim në kohë reale dhe transkriptim të shënimeve zanore. Me serinë P80, TCL po përpiqet të sjellë diçka ndryshe në segmentin e mesëm: një smartphone me ekran të fuqishëm AMOLED që, kur duhet, mund të sillet edhe si një lexues elektronik.
