Si pjesë e një goditjeje ndaj dezinformatave, qeveria Australiane planifikon të fuqizojë Autoritetin Australian të Komunikimeve dhe Mediave (ACMA) me aftësinë për të vendosur gjoba të konsiderueshme kundër gjigandëve të teknologjisë, si Facebook, Google dhe Twitter. Legjislacioni i propozuar synon t’i mbajë këto kompani përgjegjëse për përhapjen e lajmeve të rreme nëpër platformat e tyre.
Njoftuar nga Ministrja e Komunikimit Michelle Rowland, ligjet e planifikuara përfaqësojnë një hap të rëndësishëm në përballjen e qeverisë Australiane me kompanitë e mëdha teknologjike. Për vite të tëra, këta gjigandë të teknologjisë janë përpjekur të kufizojnë përhapjen e dezinformatave nëpër platformat e tyre, një problem që ka nxitur mosmarrëveshje të shumta shoqërore dhe politike.
Sipas projektligjeve, ACMA mund të vendosë gjoba potencialisht shumë miliarda dollarëshe për kompanitë e teknologjisë që në mënyrë të përsëritur dështojnë të rregullojnë përmbajtjen e dëmshme. “Dezinformimi dhe keqinformimi mbjellin ndarje brenda komunitetit, minojnë besimin në institucione, dhe mund të kërcënojnë shëndetin dhe sigurinë publike”, tha Rowland.
Ministrja theksoi përkushtimin e qeverisë për të mbrojtur Australianët në internet, duke fuqizuar ACMA për të mbajtur përgjegjëse platformat digjitale për keqinformimin.
Artikull i ngjashëm:
Titanët e teknologjisë kundër Kanadasë: Google dhe Meta përplasen me Kanadanë në betejën mbi lajmet online!
Në varësi të llojit të shkeljes, dënimet maksimale të propozuara mund të jenë nga 2%, deri në 5% të të ardhurave vjetore globale të një kompanie, në raste kur konstatohen shkelje sistematike. Në rastin e një korporate si Meta, kjo mund të rezultojë në një gjobë marramendëse që tejkalon 8 miliardë dollarë.
Ligjet e reja mund të kërkojnë gjithashtu që kompanitë të zhvillojnë mjete më të sofistikuara për të identifikuar dhe raportuar dezinformatat, bazuar në standardet e hartuara nga rregullatori i medias. Legjislacioni i propozuar është aktualisht i hapur për konsultim publik, dhe Rowland theksoi rëndësinë e arritjes së një ekuilibri midis mbrojtjes nga keqinformimi dhe lirisë së fjalës në ligjet e reja.
Artikull i ngjashëm:
Kompanitë e rrjeteve sociale duhet të paguajnë mediat: Facebook reagon me ndërprerjen e lajmeve
“I inkurajoj të gjitha palët e interesuara të bëjnë një paraqitje në këto diskutime”, tha Rowland, duke shprehur pritjen e saj për diskutimin e projektligjit në parlament gjatë pjesës së dytë të këtij viti, pas procesit të konsultimit.
