Komisioni Federal i Tregtisë (FTC) po kërkon të eliminojë në mënyrë tërësore manipulimin e reagimeve të konsumatorëve mbi produktet nga bizneset, manipulim i cili përfshin taktika si blerja e reagimeve pozitive ose përpjekjet për të fshehur ato të pafavorshme. Propozimi i rregullatorit amerikan synon të frenojë këto strategji të diskutueshme marketingu që mund të mashtrojnë konsumatorët.
“Rregullimi i kësaj problematike do të shkaktonte ndëshkime civile për shkelësit, dhe duhet të ndihmojë në rregullimin e tregut për kompanitë e ndershme”, shpjegoi Drejtori i Byrosë së Mbrojtjes së Konsumatorit të FTC, Samuel Levine. Rregullat e propozuara, jo vetëm që do t’i ndalojnë kompanitë që të përdorin në mënyrë mashtruese komentet e konsumatorëve të një produkti për të promovuar një tjetër, por gjithashtu do të parandalojnë punonjësit që të shkruajnë komente pozitive për produktet e kompanisë së tyre, pa theksuar se janë punonjës të asaj kompanie.
Një fushë e veçantë shqetësimi e cituar nga FTC është rritja e chatbot-eve të AI, të cilat potencialisht mund të mbushin tregun me rishikime të fabrikuara. Një kufizim tjetër i propozuar do të parandalonte faqet e internetit që pretendojnë se ofrojnë opinione të paanshme për një kategori produktesh ose shërbimesh.
Artikull i ngjashëm:
Chatbot-i i Google përplaset me BE-në: Ligjet e BE mbi privatësinë pengojnë publikimin europian të platformës!
Ndërsa postimi i rishikimeve false ose blerja e vlerësimeve të favorshme tashmë konsiderohet i paligjshëm sipas rregulloreve aktuale të FTC, kjo gjë nuk është përshkruar në mënyrë specifike. Në të kaluarën, FTC ka ngritur akuza ndaj fajtorëve, duke i akuzuar ata për pjesëmarrje në akte tregtare të padrejta ose mashtruese.
Sidoqoftë, një vendim i Gjykatës së Lartë të vitit 2021 ka komplikuar aftësinë e FTC për t’u kthyer para konsumatorëve të mashtruar nga praktika të tilla. Rrjedhimisht, rregullatori tani kërkon të vendosë një rregull të qartë që ndalon rishikimet e rreme. Duke vepruar kështu, mund të “rrisë frenimin e këtyre praktikave, të lejojë Komisionin të kërkojë dënime civile kundër shkelësve, dhe të marrë më lehtësisht kompensim monetar për viktimat e tyre”, shpjegoi FTC në një dokument të detajuar në lidhje me rregullat e reja.
Artikull i ngjashëm:
FTC përgatitet për betejë me Amazon
Publikut do t’i jepet mundësia të komentojë rregullat e propozuara përpara se FTC të shqyrtojë çdo ndryshim. Komisioni deklaroi: “Pasi Komisioni të shqyrtojë komentet e marra, ai do të vendosë nëse do të ndërmarrë hapat e ardhshëm të nevojshëm drejt nxjerrjes së një rregulli përfundimtar”. Ky zhvillim i ri në rregulloren për mbrojtjen e konsumatorit mund të ndikojë ndjeshëm në mënyrën se si bizneset tregtojnë produktet e tyre, duke shënuar një hap drejt rritjes së transparencës dhe ndershmërisë në vlerësimet e klientëve.
