Platforma mediatike online “ZËRI” ka bërë publike, pas gjurmimeve dhe hetimeve që gazetarët e saj kanë kryer në aplikacionin “Telegram” për grupe specifike të sigurta të pedofilëve dhe të grabitqarëve seksualë, të cilët kanë shpërndarë materiale me përmbajtje të dhunës seksuale ndaj fëmijëve. Sipas platformës, imazhet i përkasin fëmijëve, të cilët janë dhunuar seksualisht në Shqipëri dhe më pas materialet e janë shpërndarë në internet si trofe ndërmjet të rriturve.
Kjo nuk është hera e parë që platforma apo aplikacione globale në internet përdoren për të shpërndarë materiale me përmbajtje të dhunës seksuale ndaj fëmijëve. Vetëm një muaj më pare në të njëjtën platformë, iSIGURT.al – Linja Kombëtare për Internet të Sigurt për Fëmijët, ndeshi probleme serioze në lidhje me një ngjarje të përafërt me këtë të raportuar sot.
iSIGURT.al dhe CRCA/ECPAT Shqipëri janë seriozisht të shqetësuara jo vetëm për përhapjen masive të dhunës seksuale në internet ndaj fëmijëve dhe të shpërndarjes së materialeve me përmbajtje të dhunës seksuale ndaj fëmijëve, por mbi të gjitha mbi mungesën e masave nga ana e autoriteteve përgjegjëse në Shqipëri për të mbrojtur fëmijët gjatë navigimit të tyre në internet. Të dhënat më të fundit në nivel global, europian dhe kombëtar tregojnë se:
- Të paktën 15 mijë profile dhe faqe në Shqipëri u raportuan gjatë vitit 2022 si faqe / profile që përmbajnë materiale me përmbajtje të dhunës seksuale ndaj fëmijëve (NCMEC Tipline Report / Raporti Kombëtar për Sigurinë në Internet – iSIGURT.al;) Sipas Altin Hazizaj, aktualisht janë mbi 50 mijë profile pedofilësh në rrjetin social Telegram.
- Çdo sekondë, të paktën 2 imazhe me përmbajtje të dhunës seksuale ndaj fëmijëve, shpërndahen në internet. Pas çdo imazhi nuk duhet harruar që qëndron një fëmijë që ka përjetuar apo ende përjeton dhunën seksuale. (NCMEC)
- Vetëm gjatë vitit 2022, materialet me përmbajtjen më të rëndë të dhunës seksuale ndaj fëmijëve u hodhën në internet si asnjëherë më parë. 40% e këtyre materialeve tregojnë një fëmijë nën moshën 10 vjeç (Internet Watch Foundation).
Ndërkohë që të gjitha vendet europiane janë duke marr masa drastike për të mbrojtur fëmijët nga dhuna dhe shfrytëzimin seksual në internet, autoritetet në vend, por edhe prindërit, janë tërësisht të pandërgjegjësuar për krimet që fëmijët në Shqipëri ndeshin çdo ditë në internet. Pranë i SIGURT çdo ditë raportohen të paktën 2-3 kërkesa për mbyllje faqesh apo profilesh në gjuhën shqipe me përmbajtje të bulizmit ekstrem apo dhunës seksuale ndaj fëmijëve.
