2 shqiptarë së fundmi kanë ngritur një padi ndaj “Google” në Gjykatën e Lartë të Kalifornisë, për shkak të diskriminimit që kjo kompani i bën gjuhës Shqipe. Sipas tyre rregullat diskriminuese të google ndaj shqiptarëve, kanë sjellë probleme të mëdha në media, marketing dhe teknologji në Shqipëri, Kosovë dhe kudo që flitet gjuha shqipe.
Padia është ngritur nga z. Haki Dervishi – shtetas amerikan me banim në Palm Springs California, i dekoruar së fundi nga Presidenti Biden me Dekoratë dhe Arritje të Përjetshme për kontribut të vazhdueshëm për kombin amerikan, dhe Dr. Neshad Asllani – mjek i njohur kosovar, themelues i “Qendrës Kosovare për të Drejtat e Njeriut” dhe anëtar i bordit të organizatës “Decade for Human Rights” në Nju Jork.
Në padinë e ngritur thuhet se diskriminimi i vazhdueshëm që “Google” po i bën gjuhës shqipe ka bërë që shqipfolësit të diskriminohen nga pjesa tjetër e botës pasi janë përjashtuar nga platformat Google Ads dhe Google Adsense gjë që ka sjellë pasoja të mëdha në zhvillimin e biznesit, në fushën e marketingut dhe gazetari.
Pas kësaj padie të ngritur nga Dervishi dhe Asllani pritet që “Google” të shqyrtojë me interes këtë padi dhe konsiderojë shtimin e gjuhës shqipe si gjuhë zyrtare të mbështetur nga kjo kompani.
