Zëdhënësja e ministrisë së jashtme ruse, Maria Zakharova në një konferencë për mediat u shpreh se Bashkimi Europian dhe NATO po zgjerojnë qëndrat e tyre kibernetike të orjentuara për sulme kibernetike.
“Gjeografia e qendrave kibernetike vazhdon të zgjerohet. – u shpreh Zakharova – Aleanca po bën plane për të krijuar një strukturë të re të ngjashme në Shqipëri. Kështu, në Ballkan, një rajon i karakterizuar nga prania e një numri të madh problemesh të krijuara nga Perëndimi, mund të shfaqet një burim tjetër kërcënimesh hibride.
Ka gjithashtu plane për të krijuar një qendër ndërkombëtare të sigurisë kibernetike të NATO-s në Gjeorgji me mbështetjen e aleancës dhe BE-së (në koordinim me SHBA-në, Britaninë e Madhe, si dhe Estoninë dhe Lituaninë). – thotë Zakharova. Zëvendës ministrja e jashtme ruse sqaron se sipas Moskës me pretekstin e besueshëm të forcimit të potencialit dixhital dhe sigurisë së shteteve, ato po përfshihen në veprime agresive në hapësirën e informacionit.
“Uashingtoni demonstron hapur një qasje egoiste ndaj vendeve të NATO-s, duke i përdorur ato si trampolinë për aktivitete të dëmshme kundër Rusisë. Në të njëjtën kohë, operacionet sulmuese kibernetike nën një flamur të rremë, duke përfshirë sa më shumë partnerë të jetë e mundur, po bëhen një shenjë dalluese e politikës së jashtme të SHBA.” – shprehet Zakharova.
Moska pretendon se një qendër e ngjashme është krijuar në vitin 2017 në Helsinki të Finlandës, për të cilën, ushtarakët rusë thonë se vepron në sferat ushtarake, politike, diplomatike, ekonomike, informative, mjekësore dhe të tjera për të dëmtuar imazhin pozitiv të Rusisë. Zakharova më tej akuzoi NATO-n për manovra të rrezikshme lufte.
