Departamenti i Drejtësisë së Shteteve të Bashkuara njoftoi të hënën se ka konfiskuar serverat dhe 1 milion dollarë në bitcoin nga një nga grupet më aktive kriminale ruse të ransomware-it, përgjegjës për maluerët BlackSuit dhe Royal.
Sipas komunikatës për shtyp, një koalicion ndërkombëtar i agjencive të zbatimit të ligjit, përfshirë autoritete nga SHBA, Kanada, Gjermani, Irlandë, Francë, Mbretëria e Bashkuar dhe vende të tjera, ka konfiskuar më 24 korrik katër servera dhe nëntë domene. Përveç kësaj, autoritetet kanë sekuestruar edhe rreth 1 milion dollarë në kriptomonedhë.
BlackSuit dhe Royal janë dy lloje të ndryshme ransomware-i, të cilat besohet se janë zhvilluar nga i njëjti grup kriminal rus i cilësuar si përgjegjës për sulme ndaj infrastrukturave kritike në SHBA dhe më gjerë.
Agjencia amerikane për sigurinë kibernetike CISA raportoi vitin e kaluar se “aktorët e BlackSuit kanë kërkuar më shumë se 500 milionë dollarë në total, ku kërkesa më e madhe individuale për shpërblim ka qenë 60 milionë dollarë”.
Lexo edhe: Bitcoin prek një rekord tjetër, ja vlera e tij sot ndërsa Amerika debaton për rregullat e kriptovalutave
“Targetimi i vazhdueshëm nga grupi BlackSuit i infrastrukturave kritike amerikane përbën një kërcënim serioz për sigurinë publike të SHBA-së,” theksoi John A. Eisenberg, Ndihmës Prokuror i Përgjithshëm për Sigurinë Kombëtare, në komunikatën për shtyp.
Sipas Homeland Security Investigations të ICE, e cila ka udhëhequr hetimin, Royal dhe BlackSuit kanë prekur më shumë se 450 viktima në SHBA, duke përfshirë organizata në sektorët e kujdesit shëndetësor, arsimit, sigurisë publike, energjetikës dhe administratës shtetërore. Në total, kriminelët kibernetikë kanë përfituar mbi 370 milionë dollarë nga pagesat e shpërblimeve që nga viti 2022.
Bitcoinët e rikuperuar u morën nga një llogari në një platformë shkëmbimi të monedhave dixhitale, të cilës i ishin bllokuar fondet që nga janari i vitit të kaluar, sipas njoftimit.
