Në Korenë e Jugut po rritet interesi për edukimin me AI që në moshë të vogël, për të mos mbetur pas me teknologjinë. Një baba, Kim Jungu, e përdor AI gjatë lojës me djalin e tij pesëvjeçar, Dohun. Ata lexojnë libra, diskutojnë tema dhe më pas krijojnë histori ose vizualizime me ndihmën e AI, si planetë imagjinarë apo tregime mbi yjësitë. Për Kim, kjo është një mënyrë e bukur për ta mbështetur kuriozitetin dhe kreativitetin e djalit.
Dohun adhuron hapësirën dhe vizatimin, ndërsa AI i ofron pyetje dhe informacione që e nxisin të mësojë më shumë. Babai i tij beson se kjo metodë zgjeron horizontet e fëmijës, duke e udhëhequr nga sistemi diellor drejt njohurive më të thella mbi hapësirën. Megjithatë, ai pranon se është e rëndësishme të mos ketë mbështetje të tepruar tek teknologjia dhe prindërit të kujdesen për këtë proces.
Lexo edhe: Këto janë punët më të rrezikuara nga inteligjenca artificiale në Europë
Ekspertët theksojnë se çelësi është loja dhe ndërveprimi me prindërit. Profesoresha Kwon Jungmin nga Universiteti Kombëtar i Arsimit në Seul thotë se nuk ka rëndësi nëse fëmijët luajnë me Lego apo me AI, për sa kohë krijojnë marrëdhënie të shëndetshme. Por ajo paralajmëron se përdorimi i shpeshtë i AI pa mbikëqyrje mund të çojë fëmijët të mendojnë se AI është një qenie e gjallë. Prandaj, prindërit duhet të shpjegojnë qartë dallimin mes njeriut dhe teknologjisë.
Kwon shton se edukimi nuk duhet të fokusohet vetëm te AI, por edhe te mendimi kritik përmes letërsisë, filozofisë dhe shkencave humane. Nëse fëmijët nuk mësojnë si të kuptojnë teknologjinë, ata mund ta shohin si autoritet absolut. Ndërsa një edukim i plotë i ndihmon ata ta shohin AI-në si mjet, jo si fuqi për t’iu bindur. Në këtë mënyrë, shoqëria përgatitet për një brez që përdor teknologjinë me përgjegjësi, pa humbur mendimin e pavarur.
