Spotify më në fund sjell muzikë “lossless”: përdoruesit thonë se ia vlejti pritja!

Është zyrtare: Spotify ka hapur epokën e re të muzikës në cilësi origjinale, duke sjellë për abonentët Premium opsionin “lossless” – një risi që pritej prej më shumë se katër vitesh.

Opsioni i ri ofron dëgjim deri në 24-bit/44.1 kHz FLAC, duke ruajtur tingullin e pastër pa kompresim. Funksioni ka nisur të shpërndahet në mbi 50 vende, mes tyre SHBA, Britani, Gjermani, Japoni dhe shumë të tjera. Aktivizimi bëhet nga cilësimet e aplikacionit, por përdoruesit duhet ta ndezin manualisht në çdo pajisje.

Një nga kufizimet kryesore është fakti se Bluetooth nuk e mbështet këtë cilësi, ndaj Spotify sugjeron përdorimin e Spotify Connect përmes pajisjeve të kompanive si Bose dhe Yamaha. Megjithatë, shumë fansa po e cilësojnë këtë si hapin më të madh të Spotify në vite.

Lexo edhe: Ja sa ka paguar Spotify për artistët në vitin 2024

Kompania pranon se ka ardhur “me vonesë” krahasuar me rivalët. Apple Music solli muzikën lossless që në vitin 2021, ndërsa Amazon Music e ofroi falas që në 2019. Gjithsesi, Spotify garanton se pothuajse e gjithë biblioteka e saj me mbi 100 milionë këngë do të jetë në këtë cilësi.