Dëgjimi i muzikës instrumentale gjatë operacionit mund të përmirësojë ndjeshëm shërimin e pacientëve, sipas një studimi të ri.
Studimi u krye në spitalin Lok Nayak Hospital dhe në Maulana Azad Medical College në Indi, tek pacientët që po i nënshtroheshin kolecistektomisë laparoskopike, operacioni standard me “vrima të vogla” për heqjen e fshikëzës së tëmthit. Kërkimi, i botuar në revistën shkencore Music and Medicine, u zhvillua midis marsit 2023 dhe janarit 2024, duke analizuar 56 pacientë të moshës 18–65 vjeç. Qëllimi ishte të vlerësohej nëse muzika mund të ulte sasinë e anestezikut të nevojshëm dhe të reduktonte stresin përreth procedurës kirurgjikale.
Operacioni për heqjen e fshikëzës së tëmthit zakonisht zgjat më pak se një orë dhe kërkon përdorimin e pesë ose gjashtë medikamenteve të ndryshme: për t’i futur pacientët në gjumë, për të bllokuar dhimbjen, për të parandaluar kujtimet e operacionit dhe për të relaksuar muskujt. Një nga ilaçet kryesore është Propofoli, që sjell humbje të shpejtë të vetëdijes dhe rikthim të qartë pas zgjimit.
Lexo edhe: MTV fik dritat pas 44 vitesh: Fundi i një epoke që ndryshoi muzikën dhe kulturën pop
Qëllimi kryesor i studimit ishte të krahasonte sasinë totale të propofolit të përdorur midis pacientëve që dëgjonin muzikë dhe atyre që jo. Të gjithë 56 pacientët morën të njëjtin kombinim medikamentesh: një ilaç kundër të përzierave, një qetësues, fentanyl, propofol dhe një relaksues muskulor.
Të gjithë mbanin kufje me anulim zhurme, por vetëm një grup dëgjonte muzikë. Pacientët mund të zgjidhnin midis dy pjesëve instrumentale indiane, nga tingujt e butë të flautit deri tek ato të pianos. Shumica zgjodhën një kompozim me flaut që kombinonte ragat Yaman dhe Kirwani, të cilat studiuesit i përshkruan si qetësuese dhe ngritëse shpirtërore.
Lexo edhe: Spotify më në fund sjell muzikë “lossless”: përdoruesit thonë se ia vlejti pritja!
Rezultatet treguan se pacientët që dëgjonin muzikë kishin nevojë për më pak propofol: mesatarisht 6.7 mg për kg në orë, krahasuar me 7.86 mg tek grupi kontrollues, një ndryshim statistikisht domethënës. Gjithashtu, grupi me muzikë kërkoi më pak doza shtesë të fentanylit, opioidit që përdoret për të kontrolluar rritjet e presionit të gjakut ose të rrahjeve të zemrës gjatë operacionit.
Një nga gjetjet më të rëndësishme ishte se reagimi fiziologjik i stresit ndaj operacionit, i matur përmes nivelit të kortizolit në serum, ishte dukshëm më i ulët tek pacientët që dëgjuan muzikë. Pas operacionit, niveli mesatar i kortizolit tek grupi kontrollues arriti 536 IU/ml, ndërsa tek grupi me muzikë ishte 417 IU/ml. Pacientët që dëgjuan muzikë gjithashtu u zgjuan më butë nga anestezia dhe raportuan një kënaqësi më të lartë 24 orë pas ndërhyrjes./Independent
