Një studim i ri ka zbuluar se inteligjenca artificiale po përdor burime të propagandës ruse në përgjigjet e saj për luftën në Ukrainë. Sipas raportit të Institute of Strategic Dialogue (ISD) në Britani, një në pesë përgjigje të chatbot-eve të njohura si ChatGPT, Gemini, Grok dhe Deepseek, mbështetet në faqe të lidhura me propagandën ruse. Studiuesit testuan këta chatbote me mbi 300 pyetje në pesë gjuhë të ndryshme, përfshirë edhe pyetje me tone të njëanshme apo keqdashëse.
Rezultatet treguan se burimet ruse shfaqeshin më shpesh kur pyetjet përmbanin paragjykime ose dezinformata, si për shembull ato që sugjeronin se refugjatët ukrainas po planifikojnë sulme terroriste apo se burrat po rekrutohen me forcë. Raporti thekson se këto sisteme shfaqin një “konfirmim të paragjykimeve”, pra pasqyrojnë gjuhën dhe qëndrimin e përdoruesit për të ndërtuar përgjigjen e tyre, duke ndikuar edhe në përzgjedhjen e burimeve.
Lexo edhe: OpenAI thotë se mbi një milion njerëz flasin me ChatGPT për vetëvrasjen çdo javë
Sipas raportit, ChatGPT përdori trefish më shumë burime ruse kur iu përgjigj pyetjeve të njëanshme krahasuar me ato neutrale, ndërsa Grok doli si platforma që përdorte më shumë burime të tilla edhe në pyetje të zakonshme. Në disa raste, Deepseek dha deri në katër lidhje të drejtpërdrejta me media të mbështetura nga Kremlini si Sputnik dhe Russia Today. Ndërkohë, Gemini rezultoi më e kujdesshme, pasi refuzoi t’u përgjigjej disa pyetjeve me përmbajtje të rrezikshme, duke paralajmëruar përdoruesit për mundësinë e përhapjes së informacionit të pasaktë.
Sipas studiuesve, burimet ruse shfaqen më shpesh në tema që përmbajnë të ashtuquajturat “hapësira të të dhënave bosh” – pra tema për të cilat ka pak burime të besueshme në internet. Në pyetjet që lidhen me rekrutimin ushtarak të Ukrainës, 40% e përgjigjeve të Grok dhe mbi 28% të ChatGPT përdorën të paktën një burim rus. Kjo tregon se, megjithëse inteligjenca artificiale mund të jetë një mjet i fuqishëm informimi, ajo mbetet e ndikuar nga burimet që gjen në rrjet – dhe shpesh, ato burime janë të manipuluara nga propaganda.
