BE ndez alarmin/ Shein, AliExpress dhe Temu drejt bllokimit! Nis lufta ekonomike kundër gjigantëve kinezë

Bashkimi Europian pritet të ndërmarrë hapin më të fortë deri tani kundër gjigantëve aziatikë të tregtisë online Shein, AliExpress dhe Temu. Nesër, më 26 nëntor, Parlamenti Europian në Strasburg do të votojë një projektrezolutë që i bën thirrje Komisionit të BE-së të ndërhyjë për bllokimin e këtyre platformave, duke argumentuar se ato shkelin rregullat europiane dhe lejojnë qarkullimin e produkteve të paligjshme.

Ky zhvillim vjen pas një hetimi tronditës të autoriteteve franceze ndaj Shein, ku u gjetën materiale të paligjshme pornografike me fëmijë, duke shkaktuar reagim të fuqishëm publik dhe presion mbi institucionet e BE-së.

Thirrja e eurodeputetëve: Bllokim i platformave që nuk respektojnë rregullat

Eurodeputetët kërkojnë zbatimin e plotë të legjislacionit të sigurisë dixhitale dhe të produkteve, forcimin e kontrollit doganor dhe madje ndalimin e operimit në BE për çdo platformë që:

-Shkel Aktin e Shërbimeve Dixhitale (DSA);

-Lejon shitjen e produkteve të rrezikshme ose të paligjshme;

-Nuk garanton gjurmueshmësi dhe siguri për konsumatorët.

Lufta doganore nis më 12 dhjetor

Në mbledhjen e Ecofin më 12 dhjetor, ministrat e financave të BE-së do të paraqesin paketën e re të masave doganore për të ndalur shitjet direkte dhe praktikisht pa taksa që vijnë nga Kina. Ndryshimet synojnë të frenojnë “boom-in” e pakove të vogla që hyjnë çdo ditë në BE.

Aktualisht, përjashtimi “de minimis” nga TVSH dhe detyrimet doganore për pakot nën 150 euro ka shkaktuar 4.6 miliardë dërgesa të lira nga Kina vetëm vitin e kaluar, shumica nga Shein, Temu dhe AliExpress.

Fushata e reklamave para “Black Friday”

Në prag të “Black Friday”, platformat aziatike po zhvillojnë breshëri ofertash, duke shfrytëzuar “dritaren e fundit” të rregullave aktuale më të buta para shtrëngimit të madh që pritet.

Platformë doganore pan-europiane

BE synon ngritjen e një platforme të vetme doganore europiane, ku mallrat do të kontrollohen përpara importit dhe çdo produkt që nuk plotëson standardet e BE-së do të refuzohet automatikisht.

Tarifa të reja: 2 euro për pako, nga 2026

Ministrat e financave janë dakord për vendosjen e tarifave të reja:

–2 euro për çdo pako të vogël të dërguar direkt te konsumatori;

–0.50 euro për pakot që kalojnë nëpër magazina europiane.

Gjithashtu, nga viti 2026 planifikohet një “taksë doganore e thjeshtuar” për të gjitha dërgesat me vlerë të ulët.

Pse BE po godet fort?

Sipas Komisionit Europian:

-65% e pakove të vogla nga Kina deklarohen me çmime të ulëta për të shmangur taksat;

-Mallrat shpesh nuk plotësojnë standardet e sigurisë;

-Produktet shumë të lira dhe jetëshkurtra dëmtojnë mjedisin;

-Përqendrimi i tregut tek platformat kineze po godet bizneset europiane, sidomos ato të vogla dhe të mesme./replika.al