McDonald’s ka njoftuar se ka tërhequr një reklamë Krishtlindjesh të krijuar me inteligjencë artificiale në Holandë, pasi ajo u përball me kritika të forta në rrjetet sociale.
Reklama, e titulluar “Koha më e tmerrshme e vitit”, paraqiste skena kaotike të sezonit festiv: Babagjyshi i Vitit të Ri i bllokuar në trafik, një çiklist holandez i mbushur me dhurata që rrëshqet në dëborë dhe situata stresuese tipike të Krishtlindjeve. Mesazhi ishte i qartë: shmangni stresin dhe strehohuni në McDonald’s deri në janar për ta kaluar më lehtë këtë periudhë.
Megjithatë, reklama e gjeneruar nga IA e degës holandeze të McDonald’s u prit keq nga publiku. Shumë përdorues e cilësuan atë si të zymtë dhe kundër frymës festive. “Kjo reklamë ma shkatërroi plotësisht ndjenjën e Krishtlindjeve”, shkroi një komentues, ndërsa të tjerë kërkuan që kompania të hiqte dorë nga përdorimi i inteligjencës artificiale në reklama të tilla.
Në një deklaratë zyrtare, McDonald’s Holanda tha se qëllimi i reklamës ishte të pasqyronte momentet stresuese që shumë njerëz përjetojnë gjatë festave. Megjithatë, kompania pranoi se, bazuar në reagimet e publikut dhe mbulimin mediatik, për shumicën e njerëzve Krishtlindjet mbeten “koha më e mrekullueshme e vitit”, dhe për këtë arsye vendosi ta tërheqë spotin.
Nga ana tjetër, Melanie Bridge, drejtoreshë ekzekutive e Sweetshop Films – kompania që realizoi reklamën – mbrojti përdorimin e inteligjencës artificiale, duke theksuar se ajo nuk synon të zëvendësojë kreativitetin njerëzor, por ta plotësojë atë. Sipas saj, projekti kërkoi javë të tëra pune nga një ekip prej dhjetë personash, më shumë se sa një xhirim tradicional.
Debati rreth përdorimit të IA në reklama vazhdon, sidomos në industrinë e marketingut. Së fundmi, edhe Coca-Cola publikoi një reklamë festive të gjeneruar me inteligjencë artificiale, duke shmangur figurat njerëzore dhe duke u fokusuar te imazhet e kafshëve në ambiente dimërore, pas kritikave të ngjashme që kishte marrë vitin e kaluar.
