Drejtimi autonom do të ndryshojë udhëtimin dhe qytetet tona, thotë Nvidia

Drejtimi autonom po zhvillohet me shpejtësi dhe mund të bëhet realitet edhe në Europë shumë shpejt. Sipas Ali Kani, zëvendëspresident i ekipit të automjeteve në Nvidia, makinat me drejtim gjysmë-autonom mund të shihen në rrugët europiane që këtë vit, ndërsa makinat më të avancuara, që drejtohen vetë pa ndërhyrje njerëzore në kushte të caktuara, mund të vijnë nga viti 2027.

Nvidia nuk po prodhon makina, por po zhvillon teknologjinë dhe softuerin që u jep atyre “inteligjencën” për të lëvizur vetë. Inteligjenca artificiale po ul kostot dhe po përmirëson sigurinë e këtyre sistemeve. Megjithatë, Europa duhet të përshtasë rregullat dhe infrastrukturën, pasi ligjet ndryshojnë nga një shtet në tjetrin. Aktualisht lejohen sistemet e nivelit 2, ku shoferi mbetet përgjegjës, ndërsa niveli 3 është miratuar vetëm në kushte të kontrolluara.

Sipas Kani, drejtimi autonom mund të ndryshojë edhe mënyrën se si ndërtohen qytetet. Në të ardhmen, parkimet mund të zhvendosen më larg qendrave dhe hapësirat urbane mund të shfrytëzohen më shumë për njerëzit. Testime të makinave autonome tashmë po zhvillohen në qytete të mëdha europiane, si Londra, edhe pse miratimi i plotë varet nga rezultatet në situata reale.

Lexo edhe: Makina e parë fluturuese në botë, në dispozicion të blerësve në fillim të vitit 2026, ja sa kushton

Siguria mbetet prioriteti kryesor. Nvidia përdor disa sensorë njëkohësisht dhe kombinon inteligjencën artificiale me një sistem të veçantë sigurie që monitoron çdo veprim të makinës. Ideja nuk është që makina të drejtojë “më mirë se njeriu”, por që të shmangë çdo aksident. Kjo qasje i ka sjellë teknologjisë së Nvidia-s vlerësim maksimal për siguri në testet europiane.

Megjithatë, sfidat mbeten. Në vitet e ardhshme, situatat e papritura në trafik, si defektet teknike ose kushtet e jashtëzakonshme, do të jenë prova më e madhe për këto sisteme. Edhe pse rruga drejt drejtimit plotësisht autonom është e gjatë, Nvidia beson se teknologjia dhe rregullat po ecin gradualisht në drejtimin e duhur.