Samsung po zgjeron aktivitetin përtej smartphone-ve, televizorëve dhe elektroshtëpiakeve. Kompania ka njoftuar një investim prej rreth 240 miliardë wonësh, ose afërsisht 158 milionë dollarë, për ndërtimin në Korenë e Jugut të një linje të re prodhimi për sistemet HVAC, që përfshijnë teknologjitë e ngrohjes, ventilimit dhe klimatizimit.
Fabrika do të ndërtohet në kampusin e tretë të Samsung në Gwangju, në një sipërfaqe prej rreth 21,500 metrash katrorë. Ajo do të prodhojë sisteme ftohjeje të destinuara kryesisht për qendrat e të dhënave të inteligjencës artificiale, por edhe për ndërtesa të mëdha dhe struktura industriale. Nisja e prodhimit është planifikuar për vitin 2028.
AI po rrit nevojën për sisteme të reja ftohjeje
Linja e re do të fokusohet te teknologjitë e FläktGroup, kompania e specializuar në kontrollin e ajrit dhe klimatizimin profesional, të cilën Samsung e bleu në vitin 2025. Një prej produkteve kryesore do të jenë Coolant Distribution Units (CDU), pajisje që shpërndajnë lëngun ftohës në sistemet e ftohjes së serverëve.
Lexo edhe: Dua Lipa padit Samsung për 15 milionë dollarë për përdorimin e imazhit të saj për të shitur televizorë
Këto teknologji po bëhen gjithnjë e më të rëndësishme për shkak të zhvillimit të AI. GPU-të dhe procesorët e fuqishëm që përdoren për trajnimin dhe funksionimin e modeleve të inteligjencës artificiale konsumojnë shumë energji dhe prodhojnë sasi të mëdha nxehtësie, duke e bërë gjithnjë e më të vështirë përdorimin vetëm të sistemeve tradicionale të ftohjes me ajër.
Samsung do të prodhojë gjithashtu Fan Wall Units, Computer Room Air Handlers dhe Air Handling Units, të përdorura për ftohjen e serverëve dhe menaxhimin e temperaturës dhe ajrit në ambiente teknike dhe ndërtesa të mëdha.
Me investimin e ri, Samsung synon të fitojë një rol më të madh në infrastrukturën që po ndërtohet rreth inteligjencës artificiale. Fabrika e Gwangju do të bëhet linja e 15-të globale e prodhimit të FläktGroup dhe një qendër strategjike për teknologjitë e ftohjes së data center-ave të AI.
