Çipi i ri A17 Pro i Apple, i publikuar për iPhone 15 Pro dhe iPhone 15 Pro Max, u premtoi lojtarëve potencialin për të shijuar lojërat më të famshme mobile, si Resident Evil Village dhe Assassin’s Creed Mirage. Por, gjetjet e fundit sugjerojnë një problem: iPhone 15 Pro Max duket se ka probleme me mbinxehjen.
Analizuesi kinez i teknologjisë, Geekerwan, theksoi se ndërsa luante lojën Genshin Impact me grafikë të lartë, temperatura e sipërfaqes së iPhone 15 Pro Max u rrit në 48°C. Pas një sesioni lojërash prej gjysmë ore, shpejtësia e telefonit ishte mesatarisht në 59,1 FPS duke konsumuar 4,13 W energji. Për krahasim, çipi më i vjetër A16 Bionic dha një shpejtësi mesatare prej rreth 56.5 FPS me një konsum prej 4.32 W.
Çfarë do të thotë kjo? Performanca e A17 Pro është vetëm pak më e mirë, me rreth 4.4%, dhe konsumon afërsisht 4% më pak energji se paraardhësi i tij. Kjo ngre pyetje: A është sistemi i ftohjes i iPhone 15 Pro Max në nivelin e duhur?
Për më tepër, kur Geekerwan testoi Resident Evil Village, ai vuri re se performanca e telefonit u ul ndjeshëm gjatë lojërave, me shpejtësinë që ra nga 40 në rreth 30 FPS.
Sipas ekspertëve, ftohja e iPhone 15 Pro Max duket e pamjaftueshme për nxehtësinë e gjeneruar nga çipi A17 Pro, duke çuar në ulje të performancës. Lojtarët presin me padurim të shohin se si telefoni do të trajtojë lojërat e tjera mobile në të ardhmen.
