Në muajt e parë të çdo viti të ri ne përpiqemi të nxjerrim nga jeta zakonet e dëmshme dhe në përgjithësi të bëjmë realitet atë që i kemi premtuar vetes në kuadër të vlerësimit të vitit që sapo ka kaluar. Një kompani u frymëzua nga kjo dhe ofron shumën prej 10 mijë dollarësh për këdo që arrin të qëndrojë larg celularit për një muaj.
Një kompani nga Islanda e quajtur Siggi’s Dairy po lançon një program “detox digjital” dhe po fton njerëzit të marrin pjesë në procesin për t’u përzgjedhur për konkurs.
Kompania, me seli në Nju Jork, u kërkon aplikantëve të mundshëm të dërgojnë aplikimet e tyre në tekste nga 100 deri në 500 fjalë, duke përshkruar arsyet pse duan të hyjnë në këtë proces dhe si do t’i ndihmojë në jetën e tyre. Të interesuarit duhet të jenë mbi 18 vjeç dhe të dërgojnë aplikimin brenda datës 31 janar.
Më 15 shkurt do të shpallen emrat e dhjetë personave që do të përzgjidhen për të konkurruar. Procesi nuk është aq i vështirë sa duket, pasi konkurrentët do të mund të bëjnë thirrje, pasi kompania do t’u sigurojë atyre një pajisje të veçantë për këtë, një kartë SIM të veçantë, një kuti ku ata do të mbyllin telefonin e tyre, si dhe dhjetëra produkte të markës, që të mund të hanë ndërkohë që janë të detoksikuar teknologjikisht.
Sipas kompanisë, një person mesatarisht shpenzon 5.4 orë në smartfonin e tij çdo ditë. Ndoshta është koha për të provuar forcën tuaj dhe për të fituar shumë. /vizionplus.tv
