Në Zvicër, ditën e hënë, një grua 64-vjeçare vdiq në një ‘kapsulë vetëvrasëse’ të krijuar posaçërisht që përmbante gaz azot.
Është hera e parë që përdoret kjo kapsulë vetëvrasëse, e quajtur Sarco. Kapsula, një kabinë hermetike në madhësinë e një arkivoli, ofron, sipas krijuesve të saj, një ‘vdekje të shpejtë, paqësore dhe të besueshme’ pa ndihmën e mjekut apo mjekimit.
Vdekja e gruas u konfirmua nga mjeku Philip Nitschke, krijuesi i kapsulës dhe një avokat i njohur ndërkombëtarisht i lëvizjes së të drejtës për të vdekur.
Gruaja amerikane, e cila udhëtoi për në Zvicër për këtë qëllim, e nisi vetë procesin e vdekjes duke shtypur një buton teksa ishte shtrirë në kapsulë. Më pas, ajri në kabinë u zëvendësua me shpejtësi nga gazi i azotit, duke bërë që niveli i oksigjenit të bjerë në një nivel vdekjeprurës brenda një minute. Azoti nuk është helmues. Gruaja humbi ndjenjat dhe vdiq nga hipoksia, mungesa e oksigjenit, thotë organizata që e shoqëronte.
Arrestimet pas vetëvrasjes
Policia e Schaffhausen, kantoni zviceran në të cilin ndodhi vetëvrasja, arrestoi një fotograf të Volkskrant të hënën, i cili ndoqi nga afër rastin dhe donte të bënte foto. Gazeta nuk ishte në gjendje të kontaktonte fotografin për orë të tëra. Të hënën vonë në mbrëmje, policia në Schaffhausen konfirmoi se fotografi po mbahej në stacionin e policisë. Policia nuk ka dashur të japë shpjegime të mëtejshme.
Policia mund të ketë arrestuar edhe drejtorin Florian Willet të organizatës zvicerane The Last Resort, i cili ishte i pranishëm në vetëvrasje. Policia zvicerane nuk pranoi të komentojë të martën në mëngjes, vetëm duke konfirmuar se policia kishte kryer një “operacion” pranë Schaffhausen një ditë më parë.
Lexo edhe: Mjeti i inteligjencës artificiale që mund të bëjë ’81 vjet punë detektive në 30 orë’ i provuar nga policia
