Indonezia ka ndaluar shitjet e telefonave inteligjentë Google Pixel për shkak se dështoi të përmbushte kërkesat vendase, disa ditë pasi bllokoi iPhone 16 të Apple në tregun më të madh të telefonave të Azisë Juglindore.
Ministria indoneziane e Industrisë tha se telefonat e Google nuk mund të tregtohen derisa të jenë në përputhje me rregullat që kërkojnë 40% përmbajtje lokale në telefonat inteligjentë të shitur në Indonezi.
Google duhet të marrë certifikimin e përmbajtjes lokale përpara se të rifillojë shitjet, u tha gazetarëve lokalë zëdhënësi i Ministrisë së Industrisë, Febri Hendri Antoni Arief. “Rregulli i përmbajtjes lokale dhe politikat përkatëse janë bërë për drejtësi për të gjithë investitorët që investojnë në Indonezi dhe për krijimin e vlerës së shtuar dhe thellimin e strukturës së industrisë këtu,” citohet të ketë thënë Hendri.
Ndalimi vjen pas bllokimit të Indonezisë në shitjet e iPhone 16 javën e kaluar pasi Apple nuk arriti të përmbushë një angazhim investimi prej 95 milionë dollarësh. Prodhuesit kryesorë të telefonave inteligjentë duhet të prodhojnë pajisje, të zhvillojnë firmware ose të investojnë në inovacionet lokale për të përmbushur rregullat e përmbajtjes së Indonezisë.
Lexo edhe: Indonezia bllokon shitjet e iPhone 16 nga Apple, ja arsyeja e vërtetë
Rregulli indonezian kërkon që kompanitë e teknologjisë të furnizojnë 40% të komponentëve të celularit dhe tabletit brenda vendit, një kërkesë që mund të përmbushet përmes prodhimit lokal, zhvillimit të firmuerit ose investimeve të drejtpërdrejta në projekte inovative.
Kompanitë mund të plotësojnë kërkesat përmes rrugëve të ndryshme. Samsung dhe Xiaomi, për shembull, kanë krijuar objekte prodhuese, ndërsa Apple ka zgjedhur të hapë akademi zhvilluesish.
Rregullorja, e zbatuar përmes një sistemi certifikimi të quajtur “niveli i përmbajtjes lokale”, është pjesë e politikës më të gjerë industriale të Indonezisë për të shfrytëzuar tregun e saj të madh të konsumit për zhvillimin ekonomik vendas. Kompanitë që nuk arrijnë t’i përmbushin këto kufij përballen me kufizime në shitje.
