Ja cila është shkencëtarja shqiptare që po udhëheq luftën kundër kancerit në SHBA

Dr. Eneida Toska po shkëlqen në Shtetet e Bashkuara të Amerikës, duke udhëhequr një mision të rëndësishëm shkencor në luftën kundër kancerit. E vendosur në një nga institucionet më prestigjioze në botë, Johns Hopkins University, ajo drejton laboratorin e saj kërkimor “Toska Lab”, me fokus në zbulimin dhe parandalimin e metastazave të kancerit të gjirit.

Dr. Toska emigroi nga Shqipëria në SHBA në moshën 15-vjeçare dhe atje ndoqi me sukses studimet mjekësore. Pas shtatë viteve trajnimi pasdoktoral dhe një pune të palodhur kërkimore, ajo u përzgjodh ndër 5 përqind të shkencëtarëve që fitojnë të drejtën për të hapur laboratorin e tyre – një arritje e jashtëzakonshme në botën akademike amerikane.

“Gjatë periudhës pasdoktorale, shumica e atyre që kanë publikime të mira kërkojnë të hapin laboratorin e tyre, por mundësitë janë shumë të pakta. Çdo universitet ofron vetëm një ose dy pozicione të tilla. Unë aplikova në shumë universitete si Harvard, Cambridge, dhe të tjera. Kalova disa faza intervistash dhe më pas filluan të vinin ofertat – të cilat përfshijnë shuma të mëdha financiare për blerjen e pajisjeve dhe punësimin e stafit. Në fund, zgjodha Johns Hopkins si shtëpinë time shkencore,” rrëfen Dr. Toska.

Laboratori që mban emrin e saj, “Toska Lab”, ka një qëllim të qartë: të studiojë dhe të ndalojë metastazat e kancerit të gjirit. “Ne studiojmë pse tumoret e gjirit metastazojnë – shpesh në kocka, por edhe në mëlçi. Përpiqemi të kuptojmë pse shkojnë në një organ dhe jo në një tjetër, cilat janë mekanizmat molekularë dhe gjenetikë që e shkaktojnë këtë proces. Gjithashtu, kërkojmë të kuptojmë pse disa nga këto tumore bëhen rezistente ndaj trajtimeve dhe të gjejmë kura të reja që mund ta ndalojnë këtë proces,” shpjegon ajo.

Lexo edhe: Mjeti i ri i “AI” thuhet se mund të ndihmojë mjekët të japin ilaçet me recetë!

Falë punës kërkimore që ajo dhe kolegët e saj po zhvillojnë, trajtimi i kancerit ka shënuar përparime të rëndësishme. Dr. Toska tregon se vdekshmëria nga disa lloje të kancerit është ulur me 25%, ndërsa për kancerin e gjirit kjo shifër ka arritur në 45%.

Misioni i Dr. Eneida Toskës është i qartë: të kthejë laboratorin e saj në një qendër inovacioni për terapitë kundër kancerit, duke kontribuar në një të ardhme më të shëndetshme për të gjithë. Shqipëria ka arsye të jetë krenare për të.