Shqipëria po dëshmon se inovacioni në Inteligjencën Artificiale nuk njeh kufij moshe. Jori, një nxënës 14-vjeçar i apasionuar pas kodimit, ka krijuar MicroChat 3.0 — të parin chatbot shqiptar me standarde profesionale UI/UX. Pjesa më e rëndësishme e kësaj platforme është moduli edukativ “SmartLearn”, një ide e lindur nga përvoja e tij e përditshme në bankat e shkollës për të zgjidhur mungesën e materialeve interaktive në gjuhën shqipe. Përmes këtij sistemi, mësuesit dhe nxënësit mund të gjenerojnë automatikisht 15 lloje ushtrimesh të ndryshme me vetëm një foto të librit, brenda pak sekondave.
Rrugëtimi i Jorit nisi dy vite më parë gjatë një kursi bazë në programimin Python, pikërisht në kohën kur Inteligjenca Artificiale po merrte hov globalisht. Pas një pune disamujore, ai lançoi versionin e parë në nëntor të vitit 2025, për të vijuar me versionin e plotësuar MicroChat 3.0 në mars 2026. Suksesi i platformës i kaloi shpejt kufijtë lokalë; gjatë integrimit të sistemit të email-eve, vetë CEO i platformës globale Resend, Zeno Rocha, ra në kontakt me projektin dhe e vlerësoi publikisht punën e 14-vjeçarit.
Lexo edhe: Ja cila është shkencëtarja shqiptare që po udhëheq luftën kundër kancerit në SHBA
Nga ana teknike, ndërtimi i një platforme të tillë solli sfida të mëdha për të ririn shqiptar. Ndërlidhja e modeleve të avancuara si Gemini 2.5 Lite me databazën PostgreSQL kërkonte optimizim të lartë që kodi të funksiononte pa vonesa dhe pa humbje të dhënash. Jori tregon se përballja me “bug-et” dhe gabimet në kod i merrte shpesh ditë të tëra pune, por ai arriti të ndërtonte një sistem të sigurt me 12 modele dytësore (fallback logic) për të garantuar efikasitet maksimal. Për më tepër, ai mendoi edhe për lehtësinë e përdorimit nga moshatarët, duke u mundësuar nxënësve të hyjnë në ushtrime si vizitorë (Shared View), pa pasur nevojë të hapin një llogari.
Pavarësisht angazhimit si themelues i një platforme komplekse, Jori ia del të ruajë balancën mes shkollës dhe jetës personale përmes një disipline të rreptë. Ai programon rreth katër ditë në javë nga dy orë e gjysmë, duke i lënë hapësirën e duhur detyrave dhe aktivitetit fizik. Synimi i tij i radhës është bashkëpunimi me Ministrinë e Arsimit dhe Start-Up Albania për ta integruar SmartLearn si platformë zyrtare në shkollat shqiptare, si dhe zhvillimi i një asistenti me zë e figurë në gjuhën shqipe. Për bashkëmoshatarët e tij, mesazhi i Jorit është i qartë: teknologjia nuk duhet përdorur vetëm për argëtim në rrjete sociale, por si një mjet për të zgjidhur probleme reale dhe për të krijuar diçka me vlerë.
