Telefonata të rreme që frikësojnë qytetarët: “Familjari juaj është rrëmbyer”

Një mashtrim i ri po përhapet në qytete të ndryshme të SHBA-së, ku mashtruesit përdorin spoofing telefonik – duke bërë që një telefonatë të duket sikur vjen nga numri i një familjari. Ata pretendojnë se i afërmi është rrëmbyer dhe kërkojnë para si shpërblim. Një rast i tillë u bë publik në TikTok nga Sloan Dalley, e cila tregoi se burri i saj mori një telefonatë që dukej sikur vinte nga numri i saj, ku mashtruesi tha se ajo ishte peng dhe kërkoi para përmes aplikacionit Zelle.

Fatmirësisht, burri i saj nuk u mashtrua pasi kontaktoi një mik të familjes që punonte në FBI. Ky i fundit i këshilloi të mbante linjën hapur pa dërguar para dhe t’i kërkonte mashtruesit të fliste direkt me bashkëshorten, gjë që ata nuk mund ta bënin. Ndërkohë, FBI-ja arriti të gjente zonjën Dalley në spital, duke provuar se telefonata ishte plotësisht e rreme.

Ekspertët e sigurisë kibernetike paralajmërojnë se ky mashtrim është shumë realist dhe i rrezikshëm, pasi mashtruesit përdorin emra të vërtetë dhe numra realë. Ata rekomandojnë që përdoruesit të aktivizojnë mbrojtjen ndaj spoofing te operatorët telefonikë dhe të përdorin një kod sigurie shtesë për numrin e tyre. Gjithashtu, është e rëndësishme të mos ndahen publikisht në rrjete sociale informacione personale si datëlindja, emrat e kafshëve apo shkollat e ndjekura.

Lexo edhe: Demiri paralajmëron qytetarët për mesazhet nga “Posta Shqiptare”: Kujdes nga kjo skemë mashtrimi!

Sipas raportit të FBI-së për vitin 2024, krimet kibernetike janë rritur me 33% në krahasim me vitin e kaluar, duke shkaktuar humbje prej mbi 16 miliardë dollarësh. Më të prekur janë personat mbi 60 vjeç, të cilët vetëm vitin e kaluar humbën rreth 5 miliardë dollarë nga mashtrimet telefonike dhe me email. Autoritetet këshillojnë që në raste të tilla të dyshimta, qytetarët të mbyllin menjëherë telefonatën dhe të verifikojnë direkt me personin apo institucionin në fjalë./Daily Mail