Në Itali ka shpërthyer zemërim pas zbulimit të një grupi në Facebook, të quajtur Mia Moglie (Gruaja Ime), ku burrat shpërndanin foto të grave të tyre me komente fyese dhe seksiste. Disa foto ishin private ose të bëra fshehurazi, ndërsa komentet shpesh ishin poshtëruese. Grupi kishte mbi 32 mijë anëtarë dhe u mbyll vetëm pas raportimeve masive në gusht 2025.
Edhe pse Meta e mbylli grupin për shkelje të rregullave, shumë kanale të ngjashme po shfaqen sërish në Facebook e Telegram. Kjo ngre pyetjen: si është e mundur që platforma kaq të mëdha lejojnë që grupe të tilla të funksionojnë për muaj të tërë para se të bllokohen?
Nuk është hera e parë që ndodh. Në vitin 2017, Meta mbylli një grup francez me mbi 50 mijë anëtarë që shpërndanin imazhe intime pa pëlqim. Edhe Bordi Mbikëqyrës i vetë kompanisë ka kërkuar më shumë veprime kundër deepfake dhe fotove intime jo-konsensuale. Ekspertët theksojnë se politikat e Metës duken të forta në teori, por nuk zbatohen me efektshmëri në praktikë.
Lexo edhe: Telefonata të rreme që frikësojnë qytetarët: “Familjari juaj është rrëmbyer”
Sociologia digjitale Silvia Semenzin thotë se “dhuna gjinore online është bërë e zakonshme në platformat e Metës, dhe pandëshkueshmëria është rregull, jo përjashtim”. Edhe raportet ndërkombëtare tregojnë se Instagram, për shembull, nuk ndërhyn në shumicën e komenteve abuzive ndaj grave në politikë. Sipas juristes Cathy La Torre, Meta reagon më shpejt vetëm kur bëhet fjalë për përmbajtje që lidhet me fëmijët ose me interesa komerciale, ndërsa viktimat e zakonshme mbeten të pambrojtura.
Meta bashkëpunon me organizata jofitimprurëse të quajtura “flaggers të besuar”, si shoqata italiane Permesso Negato, e cila ndihmon viktimat e abuzimit online. Por këto iniciativa nuk promovohen mjaftueshëm, duke lënë shumë përdorues pa informacion se ku të kërkojnë ndihmë. Kritikët thonë se nëse Meta nuk forcon politikat e saj dhe nuk reagon më shpejt, dhuna digjitale ndaj grave do të vazhdojë të përhapet lirshëm në platformat e saj.
