Pas pushimeve verore, shumë njerëz kërkojnë mundësi të reja pune, por ekspertët paralajmërojnë se bashkë me rritjen e punësimeve shtohen edhe mashtrimet online. LinkedIn ka dhënë një paralajmërim për përdoruesit, duke i këshilluar të ruhen nga postimet e rreme për punë dhe shërbimet mashtruese të shkrimit të CV-ve, të cilat shpesh përdorin mjete të inteligjencës artificiale dhe kërkojnë zhvendosjen e bisedës jashtë platformës.
Mashtruesit shfrytëzojnë ankthin dhe mungesën e eksperiencës, sidomos tek të diplomuarit e rinj, duke ofruar shërbime që mund të komprometojnë të dhënat personale ose të kushtojnë para pa dhënë vlerë. Shumë shpallje të rreme dallohen nga mungesa e detajeve, kërkesa shumë të përgjithshme (si “të dish të lexosh” ose “të jesh mbi 18 vjeç”), apo paga tepër të larta që duken “shumë të mira për të qenë të vërteta”.
Lexo edhe: Tre shenjat që ju tregojnë se jeni duke biseduar me një chatbot me AI e jo me një njeri të vërtetë
Ekspertët këshillojnë të kontrollohet gjithmonë faqja zyrtare e kompanisë, adresa e emailit dhe stafi përkatës. Një postim serioz zakonisht ka përshkrim të detajuar dhe kërkon aftësi të caktuara. Gjithashtu, mungesa e informacionit mbi menaxherin e punësimit ose fleksibiliteti i tepruar janë shenja të tjera paralajmëruese.
Sipas LinkedIn dhe Indeed, një rekrutues i vërtetë nuk kërkon të zhvendosë komunikimin në aplikacione mesazhesh dhe as nuk kërkon të dhëna personale si numrin e pasaportës apo të llogarisë bankare. Bisedat e sigurta mbeten brenda platformave profesionale, dhe verifikimi i profilit të rekrutuesit është një hap i rëndësishëm për t’u mbrojtur nga mashtrimet.
