Çfarë është bed rotting?
Bed rotting do të thotë të rrish gjithë ditën në shtrat, pa gjumë, por edhe pa bërë asgjë të rëndësishme. Shpesh lidhet me orë të tëra duke parë telefonin ose thjesht duke parë tavanin. Ky trend u përhap në TikTok, ku videot me njerëz të mbështjellë me batanije dhe pa asnjë plan morën miliona shikime. Kur kjo sjellje përsëritet shpesh, mund të jetë shenjë e mungesës së energjisë dhe motivimit.
Pse brezi Gen Z e pëlqen kaq shumë?
Të rinjtë ndihen të lodhur nga pritshmëritë e shkollës, punës dhe rrjetet sociale. Bed rotting shihet si një mënyrë për t’i shpëtuar presionit, një pushim i vogël në mes të ditës së ngjeshur. Në rrjete sociale kjo dukuri është kthyer pothuajse në “modë”, duke u paraqitur si një gjest kujdesi për veten. Por shumë studime tregojnë edhe anën e errët: shumica ndihen fajtorë pas orëve të gjata të humbura në shtrat.
Përfitimet dhe rreziqet
Nëse bëhet me masë, bed rotting mund të ndihmojë për një “reset” mendor, ulje të stresit dhe rehati fizike. Por kur kthehet në zakon, sjell probleme. Një nga më të mëdhatë është prishja e gjumit: truri fillon të lidhe shtratin me telefon dhe jo me pushim, duke e bërë më të vështirë fjetjen. Edhe drita blu e ekraneve prish prodhimin e melatoninës, hormon që rregullon gjumin.
Lidhja me depresionin
Shqetësimi më i madh është se bed rotting i tepruar lidhet me depresionin. Kur qëndrimi në shtrat bëhet mënyrë jetese, mund të fshehë shenja serioze si izolimi dhe humbja e interesit për aktivitete. Rreziku është se këto simptoma duken si “pushim i thjeshtë”, dhe momenti kur gjërat kthehen problem serioz bëhet më i vështirë për t’u dalluar.
Lexo edhe: Pediatri neurolog zbulon: Rrezatimi i celularëve depërton në trurin e fëmijëve duke ndikuar në zhvillimin e tij
Si ta shmangim
Mënyra më e mirë për ta luftuar është krijimi i një rutine të shëndetshme. Zgjohu duke lënë dritën e diellit të hyjë në dhomë, bëj pak ushtrime ose dëgjo muzikë motivuese. Planifiko aktivitete të vogla që të motivojnë të ngrihesh nga shtrati, si një kafe me shoqërinë apo një shëtitje e shkurtër. Kështu, shtrati mbetet vend për gjumë e pushim, jo për një ditë të humbur.
