Stetoskopi inteligjent, një armë e re kundër sëmundjeve të zemrës

Stetoskopët e pajisur me inteligjencë artificiale (AI) po tregojnë potencial të jashtëzakonshëm në diagnostikimin e sëmundjeve të zemrës. Një studim i kryer nga një ekip britanik zbuloi se këto pajisje mund të identifikojnë problemet e zemrës, sëmundjet e valvulave të zemrës dhe ritmet e çrregullta kardiake pothuajse menjëherë.

Stetoskopi origjinal, i shpikur në vitin 1816, u mundëson mjekëve të dëgjojnë tingujt e brendshëm të trupit. Versioni modern përdor një mikrofon për të analizuar ndryshime shumë të vogla në rrahjet e zemrës dhe rrjedhjen e gjakut, që shpesh janë të padallueshme për veshin njerëzor. Pajisja gjithashtu realizon një elektrokardiogramë (EKG) dhe i dërgon të dhënat në “cloud” për t’u analizuar nga AI, e trajnuar me të dhëna nga dhjetëra mijëra pacientë.Studimi, i kryer nga Imperial College London dhe Imperial College Healthcare NHS Trust, përfshiu mbi 12,000 pacientë nga 96 qendra shëndetësore, të ekzaminuar me stetoskopët inteligjentë të prodhuar nga kompania amerikane Eko Health. Rezultatet u krahasuan me pacientë nga 109 qendra të tjera ku teknologjia nuk ishte përdorur.

Sipas studiuesve, pacientët me  probleme zemre kishin 2.33 herë më shumë gjasa që sëmundja të zbulohej brenda 12 muajve kur u ekzaminuan me stetoskopin inteligjent. Ritmet e çrregullta të zemrës, shpesh pa simptoma por me rrezik për goditje në tru, u zbuluan 3.5 herë më shpesh, ndërsa sëmundjet e valvulave të zemrës u identifikuan 1.9 herë më shumë.

Dr. Sonya Babu-Narayan, drejtore klinike në Fondacionin Britanik të Zemrës (BHF) dhe kardiologe, deklaroi: “Ky është një shembull i shkëlqyer se si stetoskopi i thjeshtë, i shpikur më shumë se 200 vjet më parë, mund të përmirësohet për shekullin XXI.” Ajo shtoi se inovacione të tilla janë thelbësore: “Shpesh këto sëmundje diagnostikohen vetëm në faza të avancuara, kur pacientët paraqiten në gjendje emergjente. Nëse diagnostikimi bëhet më herët, njerëzit mund të marrin trajtimin e nevojshëm për të jetuar më gjatë dhe më mirë.”

Gjetjet u prezantuan para mijëra mjekëve në kongresin vjetor të Shoqatës Evropiane të Kardiologjisë në Madrid, konferenca më e madhe në botë për shëndetin e zemrës. Plani i ardhshëm është që pajisja të shpërndahet në qendra mjekësore në jug të Londrës, Sussex dhe Uells.