Nike po përgatitet të sjellë një revolucion në botën e sportit me projektin e saj më të ri, të quajtur “Project Amplify” – një atlete e fuqizuar me motor, që synon t’i ndihmojë njerëzit e zakonshëm të ecin dhe vrapojnë më gjatë me më pak përpjekje. Kompania e përshkruan këtë shpikje si “biçikletën elektrike për këmbët”, pasi ajo “forcon lëvizjet natyrale të këmbës dhe kyçit të këmbës”.
Atletet e reja përfshijnë një motor të lehtë, një rrip lëvizës dhe një bateri të rikarikueshme të vendosur në një strukturë karboni. Nike thotë se pajisja mund të vishet edhe pa sistemin elektrik, duke ofruar fleksibilitet për përdoruesit. Sipas kompanisë, këto atlete janë krijuar për t’u dhënë sportistëve “një palë muskuj shtesë të pulpës” – një ndihmë e drejtpërdrejtë për ata që duan të shkojnë më shpejt dhe më larg me më pak lodhje.
Lexo edhe: Apple përmirëson dizajnin e brendshëm të MacBook Pro
Më shumë se 400 atletë kanë testuar 9 versione të ndryshme të “Project Amplify”, duke përshkuar mbi 2.4 milionë hapanë laboratorin kërkimor të Nike (NSRL). Sipas kompanisë, produkti është ende në fazën e testimit, por pritet të dalë në treg “në vitet e ardhshme”. Nike nuk ka dhënë ende një datë të saktë për lançimin.
Megjithatë, Nike nuk është e vetme në këtë garë për krijimin e këpucëve inteligjente. Kompania Dephy, bashkëpunëtore në këtë projekt, po përgatit lançimin e sistemit “Sidekick” – një pajisje e fuqizuar për kyçin që ndihmon në ecjen më të shpejtë dhe më të lehtë. Ndërkohë, kompani si Shift Robotics dhe ZHAW në Zvicër po zhvillojnë këpucë që përdorin inteligjencë artificiale dhe energji kinetike për të përmirësuar mënyrën si ecim, ndërsa ReWalk Robotics krijon këpucë robotike që ndihmojnë personat me vështirësi në ecje./Euronews
