A po përgatitet Meta të lançojë një version Prada të syzeve të saj inteligjente me AI? Spekulimet janë shtuar pasi Mark Zuckerberg dhe bashkëshortja e tij, Priscilla Chan, u panë në rreshtin e parë të sfilatës së koleksionit Fall/Winter 2026 të Prada gjatë Javës së Modës në Milano.
Zuckerberg u fotografua duke biseduar me Lorenzo Bertelli, drejtorin e merchandising-ut të Prada-s dhe djalin e stilistes legjendare Miuccia Prada. Prania e tij në këtë event ngriti menjëherë pikëpyetje: a ishte aty për modën, apo për biznes? Sipas raportimeve të mëparshme të CNBC, syzet Prada me AI janë në zhvillim e sipër, por Meta ende nuk ka bërë një njoftim zyrtar për një bashkëpunim të tillë. Kompania nuk ka komentuar as mbi arsyen e pranisë së Zuckerberg në Milano.
Nga Ray-Ban tek moda e luksit
Meta ka ndërtuar tashmë një partneritet të suksesshëm me gjigantin franko-italian të syzeve EssilorLuxottica, kompania që prodhon markat Ray-Ban dhe Oakley. Që nga debutimi i tyre si Ray-Ban Stories, këto syze inteligjente kanë njohur rritje të ndjeshme. Vetëm gjatë vitit 2025, janë shitur mbi 7 milionë njësi, një rritje e fortë krahasuar me 2 milionë në vitin paraardhës. Modelet Ray-Ban Meta synojnë publikun urban, ndërsa Oakley Meta janë të orientuara drejt sportistëve dhe stilit aktiv. Tani duket se hapi i radhës mund të jetë hyrja në segmentin e modës së lartë. Prada dhe EssilorLuxottica kanë rinovuar marrëveshjen e licencimit për prodhimin e syzeve nën markat Prada dhe Miu Miu për 10 vitet e ardhshme, me mundësi zgjatjeje deri në vitin 2035. Kjo e bën bashkëpunimin me Meta-n jo vetëm të mundshëm, por edhe strategjik.
Një simbol luksi me inteligjencë artificiale?
Nëse realizohet, një linjë syzesh Prada me Meta AI do t’i jepte Meta-s hyrjen e parë serioze në tregun e luksit. Deri tani, produktet e saj janë perceptuar si “tech gadgets” me stil, por jo domosdoshmërisht si aksesorë të modës së lartë. Transformimi i syzeve inteligjente në një simbol luksi mund të ndryshojë mënyrën si perceptohet teknologjia e veshshme. Një bashkëpunim me Prada do ta zhvendoste produktin nga zona e “geek-ut modern” drejt elitës së modës globale.
Por a është koha e duhur?
Megjithatë, ky zhvillim vjen në një moment delikat. Në disa vende po rritet skepticizmi ndaj pajisjeve që perceptohen si mjete survejimi. Debati është shtuar sidomos pas raportimeve të The New York Times mbi mundësinë që Meta të integrojë funksione të njohjes së fytyrës në syzet e saj. Kjo ka ngjallur reagime kritike dhe shqetësime për privatësinë. Madje, një zhvillues ka krijuar një aplikacion që paralajmëron përdoruesit nëse dikush pranë tyre mban syze AI aktive. Në këtë klimë, Meta duhet të balancojë mes inovacionit teknologjik dhe ndjeshmërisë publike për privatësinë.
