Parlamenti Europian dhe Banka Qendrore Europiane (ECB) u kanë bërë thirrje qytetarëve të Bashkimit Europian të marrin pjesë në përzgjedhjen e pamjes së re të kartëmonedhave euro. Përmes një sondazhi publik online, qytetarët mund të votojnë për dizajnin e preferuar deri më 21 shtator 2026.
Në garë janë 10 dizajne finaliste (A–J), të ndara në dy tema kryesore. Tema e parë, “Kultura Europiane”, paraqet figura të njohura që kanë lënë gjurmë në historinë, artin dhe shkencën e Evropës. Tema e dytë, “Lumenjtë dhe Zogjtë”, simbolizon lirinë, unitetin dhe lidhjen e kontinentit me natyrën.
Përzgjedhja ka ardhur pas një konkursi mbarëeuropian ku u dorëzuan mbi 1.200 aplikime nga dizajnerë. Prej tyre, 25 artistë u ftuan të zhvillonin propozimet e tyre dhe vetëm 10 dizajne arritën në fazën finale.
Dizajni fitues do të shpallet nga Banka Qendrore Europiane më vonë gjatë këtij viti, ndërsa kartëmonedhat e reja pritet të hyjnë gradualisht në qarkullim pas përfundimit të procesit të projektimit dhe prodhimit.
