Anthropic ka prezantuar një funksion të ri për Claude, që u mundëson kompanive të analizojnë bisedat e punonjësve me inteligjencën artificiale. Përmes mjetit të quajtur Smart Reports, drejtuesit mund të zbulojnë se si përdoret Claude gjatë punës, çfarë rezultatesh prodhohen dhe nëse punonjësit e përdorin për çështje personale apo tema që nuk lidhen me detyrat e tyre.
Funksioni është i disponueshëm për klientët e Claude Enterprise dhe mund të analizojë historikun e bisedave deri në 28 ditët e fundit. Sistemi shqyrton bisedat, i kategorizon sipas projekteve dhe llojit të përmbajtjes së krijuar, ndërsa gjeneron grafikë mbi produktivitetin, shpenzimet dhe përdorimin e AI nga ekipet.
Një nga veçoritë më të diskutueshme është aftësia për të identifikuar ato që Anthropic i quan “joefikasitete”, përfshirë bisedat që nuk kanë prodhuar rezultate të përdorshme dhe ato që klasifikohen si personale ose jashtë temës së punës. Menaxherët mund të filtrojnë raportet sipas datës, kostos, produktit të përdorur dhe rezultateve të gjeneruara.
Lexo edhe: Fotot e fëmijëve në Instagram mund të përdoren nga AI pa leje: Rasti i Meta ngre alarmin për privatësinë
Kompanitë mund të krijojnë deri në 10 raporte inteligjente në muaj pa kosto shtesë, ndërsa raportet e tjera tarifohen veçmas. Drejtuesit mund t’i bëjnë sistemit edhe pyetje specifike për mënyrën se si ekipet përdorin Claude.
Por kjo teknologji ngre një shqetësim të rëndësishëm për privatësinë në vendin e punës. Nëse inteligjenca artificiale mund të analizojë bisedat e punonjësve dhe t’i klasifikojë ato si produktive apo personale, ku përfundon monitorimi i punës dhe ku fillon mbikëqyrja e individit?
Ndërsa kompanitë kërkojnë të matin përfitimet nga përdorimi i AI, funksione të tilla hapin një debat të ri mbi transparencën, mbrojtjen e të dhënave dhe të drejtën e punonjësve për të ditur se si monitorohet aktiviteti i tyre digjital.
