Ish-Drejtori i PlayStation, Shawn Layden, ka paralajmëruar se kërcënimet më të mëdha të industrisë së lojërave vijnë nga gjigandët e teknologjisë si Google, Amazon, Netflix dhe Apple. Duke folur në Samitin e Investimeve të GamesIndustry.biz, Layden iu referua këtyre kompanive si “barbarë në dyert e kështjellës”, që synojnë një pjesë të tregut fitimprurës të lojërave.
Sipas Layden, i cili ishte Kryetar i grupit të studiove botërore të PlayStation deri në largimin e tij nga Sony në 2019, këta gjigandë të teknologjisë tashmë kanë ripërcaktuar industri të tjera. Apple ndryshoi mjedisin muzikor me këngët në iTunes, ndërsa Netflix ndryshoi biznesin tradicional të filmave në mënyrë të pakthyeshme me shërbimet e tij të transmetimit.
Layden argumentoi se industria e lojërave duhet të marrë iniciativën për t’u pëmirësuar në mjedisin e përditësuar të teknologjisë përpara se forcat e jashtme ta bëjnë atë. “Ne duhet të jemi mjaft të zgjuar për të analizuar këto ndryshime që vijnë dhe të përgatitemi për ato ngjarje që na presin,” tha ai.
Layden reflektoi gjithashtu për hyrjen e Sony në botën e lojrave, ku e pozicionoi veten si një platformë e palëve të treta, duke bashkëpunuar me kompani si Namco, Square, EA dhe Activision për të konkurruar me gjigantë si Sega dhe Nintendo. Veçanërisht, Sony e bindi Square të zhvendosë Final Fantasy 7 nga Nintendo në PlayStation, një lëvizje që çimentoi vendin e PlayStation në mjedisin e lojërave.
Ish-Drejtori i PlayStation në SHBA renditi konsolidimin e industrisë dhe koston në rritje të zhvillimit të lojërave si kërcënime të tjera kryesore. Ai e quajti konsolidimin “një armik të krijimtarisë” dhe përmendi se rritja e kostove të zhvillimit paraqet një “kërcënim ekzistencial” për industrinë.
Me pak fjalë, komentet e Layden shërbejnë si një paralajmërim për një industri që së shpejti mund ta gjejë veten nën sulmin e gjigandëve të teknologjisë, nëse nuk fillon të mendojë përpara dhe të inovojë nga brenda.
