Seriali i ri dokumentar me tre pjesë i Netflix, “Dancing for the Devil: The 7M TikTok Cult”, u shfaq në fillim të këtij muaji dhe tashmë ka tronditur shikuesit me pretendimet e tij për një atmosferë “kulti” brenda 7M Films, një kompani menaxhuese që punon me kërcimtarët e TikTok. Ky dokumentar tronditës hedh dritë mbi praktikat manipulative dhe shfrytëzuese që ndodhin pas kuintave të videove virale.
Seriali ndjek historinë e Motrave Wilking, Miranda dhe Melanie, dy motra kërcimtare që menaxhonin një kanal të njohur në TikTok (The Wilkings Sisters). Të afërta dhe me një sukses të jashtëzakonshëm në internet, ato arritën të fitojnë miliona ndjekës dhe një sërë partneritetesh fitimprurëse me marka të njohura. Karriera e tyre dukej e ndritur dhe plot mundësi, por fama e tyre u shndërrua shpejt në një makth të vërtetë.
Gjithçka ndryshoi në prill të vitit 2019, kur Miranda mori një mesazh nga kërcimtari James “BDash” Derrick. Pas bashkëpunimit të tyre të parë në një video kërcimi, ata nisën një lidhje romantike. Videografi i James, Isaiah Shinn, i prezantoi çiftin me Kishën Shekinah, e themeluar nga babai i Isaiah, Robert Shinn. Me kalimin e kohës, ndikimi i kësaj grupi fetar mbi Mirandën u bë i dukshëm dhe shqetësues.
Gjatë pandemisë së vitit 2020, Miranda dhe James kaluan kohë me familjen Wilking në Michigan, por pas kthimit të saj në Los Angeles, Melanie vuri re se Miranda po bëhej gjithnjë e më e tërhequr dhe e larguar. Kjo u bë edhe më e qartë kur, në janar 2021, Miranda refuzoi të merrte pjesë në funeralin e gjyshit të saj, duke thënë se kishte nevojë për leje nga “dikush më afër Zotit” për të udhëtuar. Më vonë atë vit, ajo dhe James u fejuan dhe u martuan pa praninë e asnjërit nga familja e saj. Tani ajo përdor emrin Miranda Derrick.
Në vitin 2022, shqetësimet e familjes së Mirandës arritën kulmin. Në shkurt, Melanie dhe prindërit e saj, Kelly dhe Dean, shprehën frikën e tyre për herë të parë publikisht në një lutje 40-minutëshe në Instagram Live, ku shprehën shqetësimet e tyre se Kisha Shekinah po funksiononte më shumë si një kult. Ky moment publik ishte një përpjekje e dëshpëruar për të ri-kontaktuar me Mirandën dhe për të bërë të njohur shqetësimet e tyre ndaj publikut.
Dokumentari ndan gjithashtu historitë traumatike të 2 motrave nga Koreja e Jugut, që iu bashkuan komunitetit Shekinah dhe atij që prezantohej si “Njeri i Zotit” Robert Shin por që ishte në fakt një ujk i veshur me lëkurë dele dhe që do të shkatërronte jetën dhe marrëdhënien e tyre.
“Dancing for the Devil: The 7M TikTok Cult” nuk është vetëm një dokumentar për një grup kërcimtarësh të shfrytëzuar, por edhe një reflektim mbi ndikimin e rrjeteve sociale dhe rreziqet që ato mund të sjellin. Ky serial ngre pyetje të rëndësishme mbi sigurinë e krijuesve të përmbajtjes dhe ofron një perspektivë të thellë mbi mënyrat se si fama dhe popullariteti mund të përdoren për të manipuluar dhe kontrolluar individët.
©TechNews.al
