Ashtu si me çdo printer 3D, printeri Vulcan formoi shtresë pas shtrese për të ndërtuar një objekt – përveç se ky printer është më shumë se 13,7 m i gjerë, peshon 4,75 ton dhe printon shtëpi banimi.
Këtë verë, printeri robotik nga ICON po përfundon disa prej 100 shtëpive të printuara 3D në Wolf Ranch, një komunitet në Georgetown, Teksas, rreth 30 milje nga Austin.
ICON filloi të printojë muret e asaj që thotë se është komuniteti më i madh në botë i printuar 3D në nëntor 2022. Krahasuar me ndërtimin tradicional, kompania thotë se ndërtimi me printim 3D është më i shpejtë, më pak i kushtueshëm, kërkon më pak punëtorë dhe minimizon mbetjet e materialeve të ndërtimit.
“Kjo sjell shumë efikasitet në tregun e ndërtimit,” tha menaxheri i lartë i projektit ICON Conner Jenkins. “Pra, aty ku kishte ndoshta pesë ekuipazhe të ndryshme që vinin për të ndërtuar një sistem muri, ne tani kemi një ekuipazh dhe një robot.”
Lexo edhe: Kjo është shtëpia e parë në botë e printuar 3D, 100% bio (FOTO)
Pasi pluhuri i betonit, uji, rëra dhe përbërës të tjerë përzihen së bashku dhe derdhen në printer, një grykë e shtrydh përzierjen e betonit si pastë dhëmbësh në një furçë, duke ndërtuar shtresë pas shtrese përgjatë një rruge të para-programuar që krijon mure me efekt kadifeje.
Shtëpitë njëkatëshe me tre deri në katër dhoma gjumi kërkojnë rreth tre javë për të përfunduar printimin, me themelet dhe çatitë metalike të instaluara tradicionalisht.
Jenkins tha se muret e betonit janë projektuar për të qenë rezistente ndaj ujit, mykut, termiteve dhe motit ekstrem.
