Volkswagen po përgatitet për një nga ristrukturimet më të mëdha në historinë e kompanisë. Sipas revistës gjermane Manager Magazin, e cila citon burime të brendshme, drejtori ekzekutiv Oliver Blume ka paraqitur një plan që parashikon eliminimin e deri në 100 mijë vendeve të punës në nivel global.
Nëse realizohet, ky do të ishte dyfishi i objektivit të shpallur vetëm pak muaj më parë, kur grupi njoftoi se synonte të shkurtonte rreth 50 mijë vende pune deri në vitin 2030.
Sipas raportimit, dokumenti i prezantuar bordit drejtues nuk përmban një numër përfundimtar të vendeve që do të shkurtohen, duke lënë hapësirë për mënyrën se si do të zbatohet ristrukturimi.
Volkswagen nuk e ka konfirmuar lajmin. Në një deklaratë për Euronews, një zëdhënës i kompanisë tha se çështjet përkatëse do të shqyrtohen dhe miratohen nga organet përgjegjëse, duke shtuar se kompania nuk do të komentojë përpara përfundimit të këtij procesi.
Megjithatë, drejtuesit e grupit kanë pranuar më herët se modeli aktual i biznesit nuk është më i qëndrueshëm. Sipas tyre, zhvillimi i automjeteve në Gjermani, prodhimi në Europë dhe eksportimi në tregjet globale nuk funksionon më për të gjitha markat e grupit, ndërsa industria automobilistike po kalon një transformim të thellë.
Lexo edhe: Pse Silicon Valley, Londra dhe Shenzhen janë tre kryeqytetet e teknologjisë botërore?
Katër fabrika mund të mbyllen
Përveç reduktimit të vendeve të punës, plani parashikon edhe mbylljen graduale të katër impianteve të prodhimit në Gjermani. Sipas Manager Magazin, në rrezik janë fabrikat e Volkswagen në Hanover, Zwickau dhe Emden, si edhe uzina e Audi në Neckarsulm.
Prodhimi në këto impiante pritet të ndërpritet pasi modelet aktuale të automjeteve të arrijnë fundin e ciklit të tyre të jetës.
Mbetet ende e paqartë se si mund të realizohen shkurtimet, duke pasur parasysh marrëveshjet ekzistuese me sindikatat. Volkswagen ka një garanci për ruajtjen e vendeve të punës deri në fund të vitit 2030, ndërsa Audi deri në fund të vitit 2033.
Ndryshime të thella në strukturën e grupit
Raporti zbulon gjithashtu se Volkswagen po shqyrton një transformim të modelit të organizimit. Marka kryesore Volkswagen dhe divizioni i komponentëve mund të ndahen nga grupi dhe të funksionojnë si kompani të pavarura.
Një hap i tillë do t’i krijonte kompanisë mundësinë që në të ardhmen të listojë biznese të veçanta në tregjet e kapitalit.
Një krizë që po thellohet
Planet për ristrukturim vijnë pas një përkeqësimi të rezultateve financiare. Gjatë tremujorit të parë të vitit 2026, fitimi neto i Volkswagen ra me 28%, duke zbritur në 1.56 miliardë euro, ndërsa të ardhurat u tkurrën me 2%, në 75.7 miliardë euro.
Drejtori financiar i grupit, Arno Antlitz, kishte paralajmëruar më herët se masat e kursimit të ndërmarra deri tani nuk janë të mjaftueshme.
“Kursimet e planifikuara nuk mjaftojnë. Nëse nuk veprojmë, rrezikojmë të ardhmen e kompanisë”, ishte deklarata e tij.
Presioni ndaj Volkswagen është shtuar edhe nga tarifat amerikane, të cilat sipas kompanisë krijojnë rreth 4 miliardë euro kosto shtesë çdo vit. Njëkohësisht, shitjet në Kinë , tregu më i madh i vetëm i grupit – ranë me 20% gjatë tremujorit të parë, ndërsa prodhuesit vendas, si BYD, po forcojnë pozitat e tyre jo vetëm në Kinë, por edhe në tregun europian.
