“Syzet e perversëve”? Meta përballet me kritika pasi përdoruesit filmojnë fshehurazi gra për përmbajtje virale

Syzet inteligjente të Meta, të zhvilluara në bashkëpunim me Ray-Ban dhe Oakley, po përballen me kritika të forta për mënyrën se si po përdoren nga disa persona për të filmuar fshehurazi gra në vende publike dhe për t’i publikuar më pas videot në rrjetet sociale pa pëlqimin e tyre.

Sipas një raporti të Wired, një numër gjithnjë e më i madh krijuesish përmbajtjeje dhe influencerësh po përdorin këto syze për të regjistruar afrimet e tyre ndaj grave në rrugë, qendra tregtare apo lokale nate. Videot, të cilat zakonisht përfshijnë komplimente, tentativa për njohje apo kërkesa për numër telefoni, publikohen më pas në TikTok dhe Instagram për të fituar shikime, ndërsa gratë e filmuara shpesh nuk e dinë se kanë qenë përballë një kamere.

Në rrjetet sociale, pajisjet kanë marrë edhe nofkën “pervert glasses” (“syzet e perversëve”), ndërsa organizatat për privatësinë paralajmërojnë se situata mund të bëhet edhe më shqetësuese nëse Meta shton funksione si njohja automatike e fytyrës. Mbi 70 organizata për të drejtat civile i kanë kërkuar kompanisë të heqë dorë nga çdo plan për teknologji që mund të identifikojë njerëzit në kohë reale.

Lexo edhe: Ndalohen syzet inteligjente! New York merr vendimin e papritur

Një rast që mori vëmendje ishte ai i Kassy Zanjani nga Kanadaja, e cila zbuloi vetëm më vonë se një bisedë e rastësishme me një të panjohur ishte filmuar dhe ishte bërë virale në internet. Ajo tha se u ndje e tronditur dhe e poshtëruar, pasi nuk kishte dhënë kurrë pëlqimin për t’u regjistruar.

Një tjetër investigim i mediave suedeze zbuloi se materialet e regjistruara nga këto syze mund të përfshijnë momente tepër private, si persona që ndërrojnë rroba, përdorin tualetin apo ndodhen në ambiente intime. Sipas raportimeve, një pjesë e këtyre videove përdoret edhe për trajnimin e sistemeve të inteligjencës artificiale të Meta-s, ku shqyrtohen nga punonjës njerëzorë. Disa prej tyre kanë deklaruar se shohin rregullisht pamje me informacione personale, biseda private apo përmbajtje eksplicite.

Meta ka deklaruar se përgjegjësia për respektimin e ligjit i takon përdoruesve të pajisjeve dhe thekson se syzet kanë një dritë LED që ndizet gjatë regjistrimit. Megjithatë, kritikët argumentojnë se kjo dritë mund të mbulohet lehtësisht dhe se mekanizmat ekzistues për mbrojtjen e privatësisë nuk janë gjithmonë efektivë. Debati ka rihapur diskutimin mbi kufijtë mes inovacionit teknologjik dhe të drejtës së qytetarëve për privatësi në epokën e inteligjencës artificiale.