Inteligjenca Artificiale ndez një debat të ri: Kush do ta paguajë koston e qendrave të të dhënave?

Partia Demokratike në SHBA po konsolidon mesazhin e saj politik kundër qendrave të të dhënave, duke u mbështetur te shqetësimet në rritje të amerikanëve për kostot e energjisë, përdorimin e ujit dhe përfitimet që kompanitë e mëdha të teknologjisë marrin nga lehtësimet fiskale.

Pas muajsh sondazhesh dhe testimesh të mesazheve elektorale, demokratët po përqendrohen në disa argumente kryesore për ta kthyer zgjerimin e qendrave të të dhënave në një çështje politike me peshë për zgjedhjet e ardhshme. Strategjia synon t’i paraqesë këto infrastruktura si projekte gjigante të korporatave të teknologjisë, që përfitojnë nga lehtësime të mëdha tatimore, konsumojnë sasi të konsiderueshme uji dhe rrisin kërkesën për energji.

Qasja është përforcuar nga udhëzime të reja për fushatat demokrate dhe grupet politike që i mbështesin ato. Në 11 gara elektorale të konsideruara të rëndësishme, demokratët po nxisin përdorimin e qendrave të të dhënave si argument për të goditur kandidatët republikanë, duke i lidhur projektet me korrupsionin, mungesën e transparencës dhe presionin mbi burimet lokale.

Lexo edhe: New York kufizon Inteligjencën Artificiale në shkolla, nxënësit deri në klasën e tetë nuk do ta përdorin në mësim

Një memorandum i House Majority PAC, grupi kryesor politik që mbështet kandidatët demokratë për Dhomën e Përfaqësuesve, u bën thirrje aleatëve të fokusohen te pakënaqësia që po krijohet rreth projekteve të mëdha të qendrave të të dhënave. Sipas dokumentit, mesazhet që lidhin këto projekte me kostot dhe konfliktet e interesit kanë rezultuar veçanërisht bindëse në sondazhet e zhvilluara në 24 distrikte elektorale.

Në dy duzina garash, fushatat demokrate dhe grupet aleate kanë nisur të investojnë në më shumë se 40 reklama politike që përdorin qendrat e të dhënave për të sulmuar republikanët mbi çështjet e përballueshmërisë dhe korrupsionit.

Një nga argumentet kryesore lidhet me një paketë ligjore të administratës republikane, e cila, sipas demokratëve, parashikon rreth 70 miliardë dollarë lehtësime tatimore për kompanitë e mëdha të teknologjisë dhe projektet e qendrave të të dhënave. Demokratët po përpiqen ta lidhin këtë politikë me financimin e fushatave dhe marrëdhëniet mes politikanëve dhe zhvilluesve të këtyre projekteve.

Në disa raste, mesazhet elektorale përqendrohen te investimet personale apo kontributet politike të kandidatëve të lidhura me industrinë e qendrave të të dhënave. Në raste të tjera, fokusi zhvendoset te ndikimi i këtyre projekteve mbi furnizimin me ujë dhe rrjetin elektrik.

Debati po merr një dimension edhe më të madh sepse qëndrimi publik ndaj qendrave të të dhënave ka ndryshuar me shpejtësi. Politikanë demokratë si guvernatori i Pensilvanisë Josh Shapiro dhe guvernatori i Maryland Wes Moore i kishin parë më herët këto projekte si mundësi për investime, vende të reja pune dhe zhvillim ekonomik. Por perceptimi publik është përmbysur, pasi komunitetet po shqetësohen gjithnjë e më shumë për konsumin e ujit, energjisë, zhurmën, përdorimin e tokës dhe përfitimet ekonomike afatgjata.

Sondazhi i POLITICO i zhvilluar në korrik tregon qartë këtë ndryshim. 41 për qind e amerikanëve thanë se kundërshtojnë ndërtimin e një qendre të të dhënave brenda një distance prej rreth pesë kilometrash nga banesa e tyre, ndërsa vetëm 24 për qind e mbështesin një zhvillim të tillë. Në janar, situata ishte e kundërt: 28 për qind shpreheshin kundër, ndërsa 37 për qind e mbështesnin.

Kjo e ka kthyer zgjerimin e infrastrukturës së nevojshme për inteligjencën artificiale në një çështje politike që po kapërcen ndarjet tradicionale partiake. Edhe republikanët kanë nisur të përdorin argumente kundër qendrave të të dhënave, veçanërisht kur bëhet fjalë për rritjen e çmimeve të energjisë dhe shqetësimet për konfliktet e interesit.

Megjithatë, qëndrimi i presidentit Donald Trump e ka komplikuar strategjinë republikane. Trump ka shprehur mbështetje të hapur për industrinë e qendrave të të dhënave dhe ka kritikuar lëvizjen kundër tyre, duke argumentuar se komunitetet që i refuzojnë këto projekte rrezikojnë të mbeten prapa ekonomikisht.

Demokratët, nga ana tjetër, po përpiqen ta zhvendosin debatin nga ideja e përfitimeve të teknologjisë te kostoja që këto projekte mund t’u imponojnë komuniteteve. Fokusi i tyre është te faturat e energjisë, përdorimi i burimeve publike, transparenca e marrëveshjeve dhe ndikimi mbi banorët.

Për shumë demokratë, pikërisht kjo është pika më e fortë politike: qendrat e të dhënave nuk po trajtohen më thjesht si pjesë e garës për dominimin teknologjik të SHBA-së, por si një çështje që prek drejtpërdrejt faturat e familjeve dhe burimet e komuniteteve.

Në këtë kuadër, demokratët duket se kanë gjetur një mënyrë për ta lidhur bumin e qendrave të të dhënave me dy nga temat që kanë dominuar politikën amerikane gjatë mandatit të dytë të Trump: rritjen e kostove dhe korrupsionin.

Politico