Apple hyn në epokën e telefonave të palosshëm, prezanton iPhone Duo

Apple ka prezantuar gjeneratën e re të iPhone-ve, por vëmendjen kryesore e mori një produkt krejtësisht i ri për kompaninë: iPhone Duo, telefoni i parë i palosshëm i Apple.

Prezantimi u drejtua nga CEO i ri i kompanisë, John Ternus, i cili mori drejtimin nga Tim Cook më 1 shtator. Në eventin e zhvilluar në selinë e Apple në Cupertino të Kalifornisë, Ternus prezantoi gjithashtu risitë për iPhone 18, Apple Watch dhe AirPods.

Por surpriza më e madhe erdhi në fund.

“Edhe një gjë…”, deklaroi Ternus, duke rikthyer frazën ikonike të Steve Jobs, përpara se të prezantonte iPhone Duo.

Lexo edhe: iPhone 18 mund të jetë shumë më i shtrenjtë se modelet e tjera, ja pse

iPhone Duo, telefoni i parë i palosshëm i Apple

Sipas Apple, Duo ofron “ekranin më të madh ndonjëherë në një iPhone, por që përsëri futet në xhep”.

Kur hapet, telefoni shndërrohet në një ekran prej 7.6 inçësh, rreth 80% më të madh se ai i iPhone 18 Pro.

Për herë të parë, përdoruesit do të mund të përdorin edhe Apple Pencil në një iPhone, një funksion që deri tani ishte i rezervuar kryesisht për iPad.

Duo lejon gjithashtu ndarjen e ekranit për të përdorur dy aplikacione njëkohësisht, apo edhe dy dritare të së njëjtës faqe interneti, për shembull për të krahasuar produkte gjatë blerjeve online.

Por teknologjia e re vjen me një çmim të lartë. iPhone Duo nis nga 1,999 dollarë, rreth 1,719 euro, duke u bërë iPhone-i më i shtrenjtë i prezantuar deri më sot.

Produkti pritet të dalë në treg më 23 tetor.

iPhone 18 Pro dhe Pro Max, çfarë ndryshon?

Krahas Duo, Apple prezantoi edhe iPhone 18 Pro dhe iPhone 18 Pro Max, me përmirësime në bateri, kamera dhe performancë.

Çmimet do të nisin respektivisht nga 1,199 dhe 1,299 dollarë, ndërsa porositë paraprake hapen më 12 shtator dhe shitjet më 18 shtator.

iPhone 18 Pro Max premton deri në 45 orë video playback, ndërsa modelet e reja sjellin edhe karikim më të shpejtë.

Kamera është përmirësuar me efekte të reja “cinematike”, më shumë kontrolle manuale dhe funksionin Smart Focus Tracking, i cili mund të mbajë automatikisht në fokus një person apo objekt në lëvizje.

Apple vendos bast edhe te AI dhe Siri

Një tjetër pikë e rëndësishme e gjeneratës së re është Inteligjenca Artificiale.

Apple po vendos theksin te aftësitë e reja të Siri, ndërsa privatësinë dhe sigurinë po përpiqet t’i përdorë si avantazh ndaj rivalëve që kanë avancuar më shpejt në integrimin e AI-së në telefonat e tyre.

Kompania po hyn relativisht vonë edhe në tregun e telefonave të palosshëm. Samsung, Google dhe Motorola kanë prej vitesh modele të tilla në treg.

Analistët vlerësojnë se kjo është një strategji tipike e Apple: kompania pret që një teknologji të piqet dhe më pas hyn në treg duke tentuar ta transformojë atë.

Megjithatë, telefonat e palosshëm vazhdojnë të përfaqësojnë më pak se 5% të tregut të përgjithshëm të smartphone-ve, ndaj mbetet për t’u parë nëse Apple do të arrijë ta kthejë këtë kategori nga një produkt “niche” në një zgjedhje masive.

Epoka e John Ternus nis me një iPhone krejt ndryshe

Eventi kishte një rëndësi të veçantë edhe për vetë Apple, pasi ishte prezantimi i parë madhor nën drejtimin e John Ternus.

Ai merr në dorë një nga kompanitë më të fuqishme të teknologjisë pas epokës së Tim Cook, me sfidën jo vetëm për të ruajtur suksesin e iPhone, por edhe për të përcaktuar se çfarë do të vijë pas tij.

Dhe zgjedhja e iPhone Duo si produkti simbol i fillimit të kësaj epoke duket se jep sinjalin e parë: Apple kërkon të hyjë në një fazë të re të dizajnit të iPhone-it, ndërsa beteja e ardhshme pritet të zhvillohet njëkohësisht në telefonat e palosshëm dhe Inteligjencën Artificiale.