Lajm i mirë për prodhuesit e PC, ulen çmimet për pajisjet e memories

Tregu global i DRAM-it ka përjetuar sfida të rëndësishme kohët e fundit, pasi të ardhurat e kompanive kanë arritur nivelet më të ulëta prej më shumë se një dekade. Kjo rënie ka shtyrë kompanitë kryesore në industri, duke përfshirë SK Hynix, Micron dhe Nanya, të përshpejtojnë planet e tyre të shkurtimit të pozicioneve të punës, dhe kërkimit të mënyrave për të ulur kostot e prodhimit. Një ndër kompanitë më të mëdha në këtë treg, Samsung, është përballur gjithashtu me një rënie të fitimeve, pasi kërkesa për pajisje memorieje mbetet e ulët, kryesisht për shkak të reduktimit të shpenzimeve për përditësimet e kompjuterëve dhe telefonave.

SK Hynix, një furnizues kryesor i pajisjeve të memories për Apple, mbetet optimist për një përmirësim gradual në gjysmën e dytë të këtij viti. Rimëkëmbja e parashikuar pritet të nxitet nga përmirësimi i situatës në tregun kinez, dhe kërkesa në rritje për aplikacione të inteligjencës artificiale (AI). Samsung ka një pikëpamje të ngjashme, por ka marrë vendimin e rrallë për të ulur prodhimin e pajisjeve të memories për të trajtuar problematikat e pajisjeve të cilat janë akoma të pashitura, dhe për të parandaluar rënie të mëtejshme të çmimeve.

Megjithatë, mesa duket, tregu i pajisjeve të memories ende nuk po arrin të ringrihet. Analistët e TrendForce parashikojnë se çmimi mesatar i shitjes për produktet DRAM do të vazhdojë të bjerë midis 13 dhe 18 përqind, deri në fund të qershorit. Çmimet për memorien NAND gjithashtu pritet të bien nga tetë deri në 13 përqind.

Kur fokusohemi te prodhuesit e PC-ve, është e qartë se ka ende një furnizim të bollshëm me memorie DDR4. Si rezultat, ky segment parashikohet të përballet me ulje të çmimeve në muajt në vijim. Memoria DDR5, nga ana tjetër, përballet me furnizim më të kufizuar për shkak të problemeve të përputhshmërisë me qarqet e integruara të menaxhimit të energjisë (PMIC). Në përgjithësi, çmimi mesatar i shitjes për një DRAM parashikohet të bjerë me 15 deri në 20 përqind, që është një lajm i shkëlqyer për prodhuesit e PC.

Prodhuesit e telefonave inteligjentë kanë qenë më të suksesshëm në menaxhimin e inventarit të tepërt të pajisjeve të memories, duke shfrytëzuar kërkesën e ulët të konsumatorëve për përditësimet e pajisjeve të tyre smartphone, për të negociuar çmime më të ulëta për porositë e reja DRAM dhe NAND. Kjo strategji e negocimeve pritet të ulë çmimet me 13 deri në 18 përqind për DRAM-in celular, dhe 10 deri në 15 përqind për çipat UFS.

Rimëkëmbja e ngadaltë e tregut kinez, dhe rënia e kërkesës për servera kanë rezultuar në një tepricë të pajisjeve SSD. Rrjedhimisht, çmimi mesatar i shitjes së SSD-ve të parashikohet të bjerë më tej, deri në 15 përqind në muajt në vijim. Një prirje e ngjashme mund të vërehet në SSD-të konsumatore, duke ndikuar në çmimet si në tregjet e kompjuterëve, ashtu edhe në ato të konsolave, si PlayStation apo Xbox.

Megjithatë, ekspertë të industrisë paralajmërojnë se strategjia e reduktimeve të mëtejshme të çmimeve, mund të mos jetë qëndrueshme. Shitja e pajisjeve nën kosto, ndërsa kërkesa mbetet e ulët, mund të çojë në përballjen e disa prodhuesve të SSD-ve me sfida financiare, potencialisht edhe falimentim.