Bashkimi Europian miraton blerjen e Activision nga Microsoft

Bashkimi Europian (BE) i ka dhënë dritën jeshile blerjes prej 69 miliardë dollarësh nga Microsoft të titanit të lojërave video, Activision Blizzard. Miratimi, i publikuar nga Komisioni Europian të hënën, është nxitur nga angazhimi i Microsoft për të licencuar lojërat e Activision në platformat e lojërave cloud, një lëvizje që besohet se ofron përfitime të rëndësishme për konkurrencën dhe konsumatorët.

CEO i Activision, Bobby Kotick, shprehu kënaqësinë e tij për miratimin, duke deklaruar se Activision synon të zgjerojë ndjeshëm investimet dhe fuqinë punëtore në të gjithë BE-në. Gjithashtu, Activision gjykon se ky bashkëpunim do të sjellë përfitime të rëndësishme për lojtarët në Europë, dhe në mbarë botën.

Marrëveshja është analizuar në mënyrë të veçantë nga rregullatorët globalë, me frikën se mund të sjellë një situatë monopoli në tregun e lojrave, pasi Microsoft mund të shfrytëzojë lojërat shumë popullore të Activision, duke përfshirë Call of Duty dhe World of Warcraft. Blerja nuk është ende e finalizuar, pasi u bllokua nga rregullatorët Britanikë në prill. Gjithshtu, Komisioni Federal i Tregtisë i SHBA-së e ka etiketuar atë një blerje të paligjshme.

Autoriteti i Konkurrencës dhe Tregjeve të Mbretërisë së Bashkuar, në raportin e tij përfundimtar, deklaroi se e vetmja zgjidhje e mundshme për qendrueshmërinë e konkurrencës në këtë treg është “ndalimi i bashkimit” të këtyre dy kompanive.

Në një përpjekje për të zbutur kundërshtimet, Microsoft ka propozuar një marrëveshje me Nintendo, për të licencuar lojërat e famshme të Activision, si Call of Duty. Gjithashtu, Microsoft po përpiqet të bëjë një marrëveshje të ngjashme me Sony.

Komisioni Europian hodhi poshtë shqetësimet se Microsoft mund të përjashtonte lojërat e tij nga PlayStation, duke pohuar se një veprim i tillë do të ndikonte ndjeshëm në marzhet e fitimit, duke pasur parasysh popullaritetin e PlayStation në tregun e lojërave.

Teknologjia e lojërave cloud të Microsoft premton të revolucionalizojë lojërat, duke mundësuar transmetimin në tablet, telefona dhe pajisje të tjera, duke çliruar lojtarët nga nevoja për të blerë konsola të kushtueshme, apo kompjuterë lojrash.

Kotick theksoi rolin e rëndësishëm të Europës në zhvillimin e lojrave, veçanërisht të lojërave celulare. Ai tha se ekipet e talentuara të Acitivisio në Suedi, Spanjë, Gjermani, Rumani, Poloni dhe shumë vende të tjera evropiane kanë aftësitë, ambiciet, dhe mbështetjen e qeverive, që nevojiten për të konkurruar efektivisht në një shkallë globale.

Marrëveshja mes Microsoft dhe Activision, e cila u njoftua më shumë se një vit më parë, është përballur gjithashtu me kundërshtime nga homologët e industrisë, si Sony apo kompani të tjera.