Take-Two Interactive, kompania përgjegjëse për publikimin e lojës së njohur Grand Theft Auto, duket se ka lënë të kuptohet për publikimin e shumëpritur të Grand Theft Auto 6. Duke pasur parasysh informacionin e publikuar në raportin financiar të kompanisë, loja mund të dalë që në fillim të vitit të ardhshëm.
Gjigandi i lojrave publikoi parashikime ambicioze të të ardhurave për vitet fiskale 2025 dhe 2026 në raportin e saj të fundit financiar. Për referencë, viti fiskal 2025 nis në prill 2024. “Viti fiskal 2025 pritet me padurim nga kompania jonë”, shkruhet në raport. Raporti diskuton mbi numrin e madh të projekteve të përgatitura gjatë viteve të fundit të Take-Two, që janë gati të dërgojnë kompaninë në nivele të larta suksesi. Kompania parashikon publikimin e disa lojërave novatore në Vitin Fiskal 2025, duke synuar të ripërcaktojë standardet e industrisë, dhe të ketë të ardhura neto mbi vlerën e 8 miliardë dollarëve. Kjo situatë pritet të vazhdojë edhe në vitin Fiskal 2026, duke pritur rezultate edhe më mbresëlënëse operative.
Take-Two nuk i referohet në mënyrë të qartë Grand Theft Auto në raportin e saj financiar. Megjithatë, pak lojëra të tjera do të ishin të afta për të udhëhequr këtë shkallë suksesi. Të ardhurat neto të Take-Two në vitin e kaluar fiskal arritën një rekord prej 5.3 miliardë dollarësh, duke u rritur ndjeshëm nga blerja e Zynga. Para blerjes, të ardhurat vjetore neto lëviznin në rreth 3 miliardë dollarë, dhe ishin në një trajektore të qëndrueshme rritëse.
Për të arritur objektivin ambicioz prej 8 miliardë dollarësh, Take-Two do të kishte nevojë për blerje të konsiderueshme, një rritje të konsiderueshme të prodhimit të lojërave, ose publikimin e një loje që do të sillte shitje të jashtëzakonshme. Pritja e të ardhurave më të larta vitin e ardhshëm, mund të nënkuptojë një version të ri të lojës së famshme GTA. Pak, nëse ka, lojëra të tjera mund të jenë të afta për të gjeneruar të ardhura të tilla.
Kur u pyet në lidhje me këtë teori gjatë një diskutimi publik, CEO i Take-Two, Strauss Zelnick zgjodhi të mos konfirmojë apo mohojë spekulimet, duke përmendur politikën e kompanisë për të qëndruar në heshtje për lojërat e papublikuara.
Grand Theft Auto V, loja më e shitur e të gjitha kohërave, vazhdon të shesë rreth njëzet milionë kopje në vit, gjatë disa viteve të fundit. Me shitjet totale të kopjeve që kalojnë 180 milionë, GTA Online mbetet një gjenerues i rëndësishëm i të ardhurave për Take-Two. Zhvillimi aktiv i GTA 6 u konfirmua nga Rockstar vitin e kaluar, megjithëse kompania ka mbetur përgjithësisht e heshtur për përditësimet e saj.
