Eventet dhe panairet që lidhen me teknologjinë po bëhen gjithnjë e më të shpeshta në Shqipëri, e sidomos në Tiranë, kryeqendrën e diskutimeve mbi inovacionet dhe shërbimet e së ardhmes.
I rradhës është Tirana Tech Open, në edicionin e tij të dytë. Ky event zhvillohet në datat 2 dhe 3 Nëntor në ambjentet e Expocity Albania. Me pjesëmarrjen e 100 sipërmarrjeve, mes të cilave startup, korporata dhe biznese që operojnë në vend, së bashku me institucione qeveritare, investitorë, institucione donatore, universitete dhe studentë, Tirana Tech Open 2023 pritet të mirëpresë mbi 3000 vizitorë!
Hapësira do të jetë e organizuar mes pesë zonave:
TTO Zone synon të krijojë një atmosferë frymëzuese dhe të sigurojë një përvojë të qetë. Aty do të gjeni gjithçka që ju nevojitet në një vend të vetëm: demonstrime teknologjike dhe zgjidhje nga ekspozuesit tanë, diskutime dhe histori suksesi nga bizneset, institucionet dhe startup-et, si dhe salla networking për të krijuar lidhje të vlefshme.
Në këtë Zone mund të njiheni me prurjet e reja nga Etronic.al dhe Futura Tech, kompani në fushën e Teknologjisë dhe Informacionit që vazhdimisht sjellin produktet më inovative në treg.
Forum Zone është krijuar si një mundësi për të marrë pjesë në panele diskutimi, për të mësuar nga historitë e suksesit dhe për të trajtuar tematika të tilla si: sfidat e arsimit dhe punësimit në industrinë e teknologjisë, investimet në teknologji, inovacion dhe sipërmarrje.
Edu Zone është zona e dedikuar për të rinjtë entuziastë, që janë të apasionuar pas përdorimit të teknologjisë dhe aplikimeve të saj. 100 studentë, përfaqësues të universiteteve dhe shkollave profesionale, do të ndjekin një workshop 3-ditor nën drejtimin e mentorëve të specializuar.
B2B Zone është projektuar që të jetë një hapësirë e hapur rrjeti dhe një zonë me rezervime. Ajo do të jetë e disponueshme për bizneset pjesëmarrëse të niveleve të ndryshme (përfshirë edhe iniciativat e reja startup), duke synuar të nxisë shkëmbimin e njohurive, informacioneve mbi zhvillimet më të fundit, rezultateve përkatëse dhe produkteve dhe shërbimeve, si dhe të mundësojë fusha të reja bashkëpunimi ndërmjet palëve.
Media Zone do të përfshijë një kabinë fotografike falas dhe stenda mediatike për intervista ekskluzive: të ftuar, partnerë, sponsorë, histori suksesi, etj.
