X-i i Elon Musk hedh hapin e parë për t’u pajtuar me gjyqtarin lidhur me bllokimin në Brazil

Elon Musk luftoi ligjin. Ligji duket se ka fituar.

Bëhet e ditur se platforma X e Musk është tërhequr nga “lufta” e saj me gjyqësorin brazilian, pasi u pajtua me urdhrat e gjykatës që kishin bllokuar përdoruesit në vend nga qasja në X.

Platforma iu përkul një prej kërkesave kryesore të bëra nga Gjykata Supreme e Brazilit duke emëruar një përfaqësues ligjor në vend.

Ajo gjithashtu pagoi gjobat e papaguara dhe hoqi llogaritë e përdoruesve që gjykata kishte urdhëruar të hiqen mbi bazën se ato kërcënonin demokracinë e vendit.

Megjithatë, beteja nuk ka përfunduar plotësisht.

Gjykata Supreme tha se X nuk kishte paraqitur dokumentacionin e duhur që tregonte se kishte emëruar Rachel de Oliveira Conceicao si përfaqësuesen e saj braziliane.

Ajo i dha kompanisë pesë ditë për të paraqitur dokumentet që vërtetonin emërimin e saj.

Siç raportohet, Musk ka qenë në mosmarrëveshje me gjykatësin Alexandre de Moraes që nga prilli, pasi ai urdhëroi kompaninë të hiqte më shumë se 100 llogari që kishin vënë në pikëpyetje nëse presidenti i ekstremit të djathtë Jair Bolsonaro kishte humbur me të vërtetë zgjedhjet në vitin 2022.

Nga mesi i gushtit, Musk kishte mbyllur zyrat e X në Brazil, duke e lënë atë pa një përfaqësues ligjor në vend.

Lexo edhe: Brazili bllokon platformën X dhe vë gjoba të frikshme për ata që e përdorin

Moraes iu përgjigj duke urdhëruar ofruesit e shërbimeve celulare dhe të internetit të Brazilit të bllokonin qasjen në X.

Ndër tjera, Musk kishte përdorur platformën e tij për të sulmuar Moraes, duke e përshkruar si një “tiran të keq”.

Ndryshe, javën e kaluar X u rishfaq në Brazil pas një përditësimi të softuerit që u tha se kishte qenë një “rikthim i paqëllimshëm dhe i përkohshëm i shërbimit për përdoruesit brazilianë”.