Çfarë të bëni nëse ju hakojnë profilin ose faqen tuaj të Facebook?

Facebook-u ka vite që është pjesë e përditshmërisë sonë, si për komunikim personal, ashtu edhe për menaxhim faqesh biznesi, grupesh apo reklamash. Por, sa më shumë që zgjerohet përdorimi i tij, aq më shumë rritet edhe rreziku i hakimeve. Nga humbja e aksesit në profil, te fshirja e faqeve apo dërgimi i mesazheve mashtruese në emrin tuaj — pasojat mund të jenë të mëdha.

Nëse ju ka ndodhur që të mos mund të hyni më në llogarinë ose faqen tuaj të Facebook, është e rëndësishme të veproni shpejt dhe me kujdes. Më poshtë do të gjeni hapat që duhet të ndiqni për rikuperim, si dhe masat mbrojtëse që mund t’i merrni sot, për të shmangur çdo rrezik në të ardhmen.

Masat që duhet të merrni

1. Aktivizoni Two-Factor Authentication (2FA)
Ky është hapi më i fuqishëm i sigurisë. Sa herë që dikush (madje edhe ju) përpiqet të hyjë nga një pajisje e re, do t’i duhet të fusë një kod të dërguar në telefonin tuaj ose në një aplikacion sigurie.
Si ta aktivizoni? Shkoni te Settings & Privacy > Security and Login > Use two-factor authentication dhe ndiqni hapat.

2. Përdorni fjalëkalime të forta dhe unike
Mos përdorni të njëjtin fjalëkalim që keni për email ose rrjete të tjera sociale. Për më shumë siguri, përdorni një menaxher fjalëkalimesh.

3. Kufizoni aksesin në faqe
Nëse menaxhoni faqe biznesi, jepni role vetëm personave që i njihni dhe u besoni. Shmangni që t’i lini shumë adminë faqes suaj.

4. Kini kujdes me linket dhe mesazhet e dyshimta
Shumë hakime ndodhin përmes phishing — ku klikoni në një link të rremë dhe jepni aksidentalisht të dhënat tuaja. Asnjëherë mos jepni fjalëkalimin në faqe që duken të dyshimta.

Lexo edhe: 10 gjëra të ndaluara në Facebook që mund t’ju bllokojnë llogarinë tuaj

Çfarë të Bëni nëse Ju Hakojnë Profilin ose Faqen?

1. Kontrolloni emailin për njoftime nga Facebook
Nëse dikush ka ndryshuar emailin ose fjalëkalimin tuaj, Facebook do t’ju dërgojë një email. Në këtë email zakonisht ka opsionin “Revert this change” — klikoni aty sa më shpejt.

2. Përdorni qendrën e rikuperimit të Facebook
Nëse nuk mund të hyni në llogarinë tuaj, vizitoni këtë faqe zyrtare për rikuperim:
https://www.facebook.com/hacked

3. Njoftoni Facebook-un që profili ose faqja është komprometuar
Nëse jeni administrator i një faqeje dhe hakerat ju kanë hequr nga faqa, mund të raportoni rastin si faqe e hakuar. Facebook do t’ju kërkojë të verifikoni identitetin tuaj për të rikthyer kontrollin.

4. Njoftoni kontaktet tuaja
Nëse e rikuperoni llogarinë, paralajmëroni miqtë ose ndjekësit që të mos klikojnë në mesazhe ose postime të dyshimta që janë dërguar gjatë kohës që ishte e hakuar.

Si të Ruani Sigurinë edhe Pas Rikuperimit?

• Ndërroni fjalëkalimin menjëherë dhe kontrolloni që 2FA të jetë aktiv.
• Hiqni pajisjet e panjohura nga lista e logimeve. Shkoni te Security and Login > Where You’re Logged In dhe dilni nga çdo pajisje që nuk e njihni.
• Shikoni dhe kontrolloni aplikacionet e lidhura. Shkoni te Settings > Apps and Websites dhe hiqni çdo aplikacion të dyshimtë që ka pasur akses në llogarinë tuaj.

Facebook-u mund të jetë zemra e komunikimit tuaj digjital, por është edhe një nga objektivat më të zakonshëm për hakerat. Me pak masa të thjeshta sigurie, mund të shmangni shumë dhimbje koke. Mos e lini për nesër: aktivizoni 2FA sot dhe kontrolloni rolet e faqeve tuaja!