SpaceX ka shënuar një arritje historike në eksplorimin e hapësirës. Për herë të parë, sipas njoftimit, anija kozmike Starship është rikthyer nga orbita dhe është kapur me sukses nga krahët gjigantë mekanikë të kullës Mechazilla, në bazën Starbase të kompanisë.
Arritja u realizua gjatë testit të 15-të të fluturimit të Starship. Anija kaloi rreth 22 orë në hapësirë, përfundoi 14 orbita rreth Tokës dhe vendosi në hapësirë 26 satelitë të gjeneratës së re Starlink V3.
Ndryshe nga uljet tradicionale, Starship nuk u ul në tokë duke përdorur këmbë mbështetëse. Pas rikthimit në atmosferën e Tokës, anija u drejtua drejt kullës së lëshimit, ku u kap nga dy krahët e mëdhenj mekanikë të sistemit Mechazilla.
Lexo edhe: Twitter rikthehet? Ish-punonjësi sfidon Elon Musk dhe ringjall “zogun blu”
Megjithatë, testi nuk ishte plotësisht i suksesshëm. Raketa përforcuese Super Heavy nuk arriti të rikthehej me sukses, por kapja e Starship konsiderohet një hap i rëndësishëm drejt objektivit të SpaceX për të zhvilluar raketa plotësisht të ripërdorshme.
Kjo teknologji mund të ndryshojë rrënjësisht industrinë hapësinore. Ripërdorimi i raketave dhe anijeve kozmike mund të ulë ndjeshëm kostot e lëshimeve, të mundësojë misione më të shpeshta dhe të përshpejtojë planet për eksplorimin e Hënës dhe Marsit.
Objektivi afatgjatë i SpaceX është ta bëjë udhëtimin hapësinor më të lirë dhe më të aksesueshëm, duke hapur rrugën për misione të ardhshme me njerëz drejt Marsit.


